Cənub bölgəsində 20 Yanvar şəhidlərinin xatirəsi yad olunub
Astara-Lənkəran-Masallı-Cəlilabad-Lerik, 20 yanvar, Bağır Əliyev, AZƏRTAC
1990-cı ilin Yanvar qırğını nə qədər faciəli olsa da, Azərbaycan xalqının iradəsini, mübarizə əzmini qıra bilmədi. Həmin faciədə həlak olan Vətən oğulları şəhidliyi ilə tarixə parlaq səhifə yazdılar.
Qanlı Yanvar gecəsində imperiya ordusunun vəhşiliyi nəticəsində 147 nəfər əliyalın, günahsız insan amansızlıqla qətlə yetirilib, 744 nəfər yaralanıb.
AZƏRTAC xəbər verir ki, yanvarın 20-də Qanlı Yanvar faciəsinin 26-cı ildönümü ilə əlaqədar Astara şəhərindəki Şəhidlər xiyabanında keçirilən anım mərasimində azadlıq mücahidlərinin xatirəsi ehtiramla yad edilib.
Rayon rəhbərliyi, idarə, müəssisə və təşkilatların nümayəndələri, müharibə və əmək veteranları, təhsil, səhiyyə, mədəniyyət işçiləri, ictimaiyyətin təmsilçiləri və şəhər sakinləri “Şəhidlər” abidə-kompleksinin önünə əklil və gül dəstələri düzüblər. Burada şəhidlərin ruhuna dualar oxunub.
Mərasimdə bildirilib ki, böyük itkilərlə, günahsız insanların qətli ilə tarixə düşən 20 Yanvar faciəsi, Mixail Qorbaçov başda olmaqla, cinayətkar imperiya rəhbərlərinin Azərbaycana qarşı xəyanətini, öz azadlığına, müstəqilliyinə qalxan xalqın isə mübarizliyini, məğrurluğunu nümayiş etdirdi.
Diqqətə çatdırılıb ki, həmin müdhiş qış gecəsində imperiya əsgərlərinin gülləsinə tuş gələnlərdən iki nəfəri də astaralı idi. Bunlar rayonun Balaca Şahağac kənd sakini Əliyev Çingiz Mirzəhüseyn oğlu və Səlivə kənd sakini Əsgərov Novruz Faiq oğludur.
Mərasim iştirakçıları 20 Yanvar faciəsinin dəhşətlərini əks etdirən sərgi ilə tanış olublar.
Ümumxalq Hüzn Günü ilə əlaqədar rayonun ərazisində dövlət bayraqları endirilib, saat 12.00-da bütün yaşayış məntəqələrində şəhidlərin xatirəsi bir dəqiqəlik sükutla yad edilib.
X X X
Xalqımızın qəhrəmanlıq səhifəsi olan 20 Yanvar faciəsinin 26-cı ildönümü respublikamızın hər yerində olduğu kimi, Lənkəranda da dərin hüznlə qeyd olunub.
AZƏRTAC xəbər verir ki, səhər saatlarından Şəhidlər xiyabanında böyük izdiham var idi. Rayon rəhbərliyi, hüquq mühafizə orqanlarının, idarə, müəssisə və təşkilatların əməkdaşları, ictimaiyyətin təmsilçiləri abidə-kompleksinin önünə gül-çiçək dəstələri düzərək, şəhidlərin xatirəsini ehtiramla yad ediblər.
Lənkəran şəhərindəki Heydər Əliyev Mərkəzində isə kinorejissor Vahid Mustafayevin “Qanlı Yanvar” bədii filmi nümayiş olunub.
X X X
20 Yanvar faciəsinin 26-cı ildönümü ilə əlaqədar Masallı rayonunda bir sıra tədbirlər həyata keçirilib. Həmin tədbirlərin yekunu olaraq “Qəhrəmanlar parkı”nda, 20 Yanvar şəhidlərinin xatirəsinə ucaldılmış abidə-kompleksinin önündə anım mərasimi keçirilib.
AZƏRTAC xəbər verir ki, anım mərasimində rayon rəhbərliyi, hüquq mühafizə orqanlarının, idarə, müəssisə və təşkilatların nümayəndələri, məktəblilər, ziyalılar, ikinci Dünya və Qarabağ müharibəsinin veteranları, ictimaiyyətin təmsilçiləri 20 Yanvar şəhidlərinin abidəsi önünə əklillər, təzə-tər gül dəstələri düzərək onların xatirəsini ehtiramla yad ediblər. Burada şəhidlərin ruhuna dualar oxunub.
Rayonun bədii özfəaliyyət kollektivlərinin ifasında 20 Yanvar faciəsinin dəhşətlərini əks etdirən ədəbi-bədii kompozisiya nümayiş etdirilib.
X X X
Ümumxalq Hüzn Günü ilə əlaqədar Cəlilabad şəhərindəki Şəhidlər xiyabanında keçirilən anım mərasimində rayon rəhbərliyi, hüquq mühafizə orqanlarının, idarə, müəssisə və təşkilatların və ictimaiyyətin nümayəndələri şəhidlərin rəsmlərinin həkk olunduğu mərmər lövhələrin önünə əklillər və tər qərənfillər düzüblər.
Tədbir ədəbi-bədii kompozisiya ilə davam etdirilib.
Mərasimdə çıxış edən rayon icra hakimiyyətinin başçısı Əziz Əzizov xalqımıza qarşı törədilən Qanlı Yanvar faciəsinin baş vermə səbəbləri barədə ətraflı məlumat verib.
Qeyd olunub ki, ötən əsrin 80-ci illərinin sonu 90-cı illərinin əvvəllərində dağılmaqda olan sovet imperiyası öz ömrünü uzatmaq, müstəqillik uğrunda mübarizəyə qalxmış xalqları bu mübarizədən çəkindirmək üçün qanlı qırğınlar törətməkdən belə çəkinməyib. Belə qanlı hadisələrdən biri 1990-cı il yanvarın 19-dan 20-nə keçən gecə Azərbaycan xalqına qarşı törədilib.
Mərasimdə 20 Yanvar faciəsi qurbanlarının xatirəsinə müqəddəs “Qurani Kərim”dən ayələr oxunub, ehsan verilib, 20 Yanvar və şəhid ailələrinə, Qarabağ müharibəsi əlillərinə maddi yardımlar edilib.
X X X
20 Yanvar şəhidlərinin xatirəsi Lerik şəhərində də anılıb. Bu münasibətlə “Şəhidlər” abidə-kompleksinin önündə ümumrayon tədbiri keçirilib.
Mərasimdə qeyd olunub ki, Azərbaycan xalqının tarixinə Qanlı Yanvar kimi daxil olmuş, 1990-cı il yanvar ayının 19-dan 20-nə keçən gecə törədilmiş hadisədən 26 il ötür. Bu hadisə keçmiş sovet imperiyasının Azərbaycan xalqına qarşı həyata keçirdiyi hərbi təcavüz, insanlığa qarşı törədilmiş ən ağır cinayətlərdən biri kimi tarixdə qalacaq.
Sonra abidə-kompleksinin önünə tər gül-çiçək dəstələri düzülüb.
Anım mərasimi rayon mədəniyyət mərkəzi və şəhər 1 nömrəli texniki fənlər təmayüllü liseyin hazırladığı ədəbi-bədii kompozisiya ilə davam etdirilib.
Saat 12:00-da rayon ərazisində şəhidlərin xatirəsi bir dəqiqlik sükutla yad olunub.
Bölmənin digər xəbərləri
