Cənubi Qafqazda gedən proseslər digər məkanlarda sülhün qurulması üçün model olacaq
Strasburq, 9 oktyabr, AZƏRTAC
Cənubi Qafqazda gedən proseslər gələcəkdə bir çox digər məkanlarda da sülhün qurulması üçün model olacaq. Əsas düyün qırılıb, münaqişə başa çatıb. Azərbaycanın Qarabağ bölgəsində elan edilmiş qondarma “respublika” özünü rəsmən ləğv edib. Ermənilərdən gedənlər də var, Azərbaycan cəmiyyətinə qoşulub digər vətəndaşlarla bərabər Azərbaycan qanunları çərçivəsində həyatını davam etdirmək üçün qalanlar da var.
Bölgədəki terrorçular və qeyri-qanuni silahlı birləşmələr zərərsizləşdirilib, işğal olunmuş torpaqlar azad edilib, məcburi köçkünlər tədricən öz evlərinə qayıdırlar.
AZƏRTAC xəbər verir ki, bu fikirləri AŞPA-dakı Azərbaycan nümayəndə heyətinin üzvü Rafael Hüseynov qurumun payız sessiyası çərçivəsində inkişaf hesabatının müzakirələri zamanı çıxışında deyib. O qeyd edib ki, Avropa Şurasının 75 illik yubileyi ərəfəsində son inkişaf hesabatı müzakirə olunur. Bu gün Avropa tarixində mühüm mərhələni, ciddi keçid dövrünü yaşayırıq.
“Azərbaycan və Ermənistan liderləri ölkələrin ərazi bütövlüyünü qarşılıqlı tanıdıqlarını açıq şəkildə bildirdilər. Gözlənilən sülhə nail olmaq üçün çox vaxt lazım oldu. Münaqişə 35 il ağrılı, qanlı, itkili yol keçdi. Onun acı dərsləri hər iki xalqa, eləcə də bütün başqa millət və dövlətlərə dərs olmalıdır. 2001-ci ildən Avropa Şurası Azərbaycan və Ermənistanı bərabərhüquqlu üzv kimi qəbul etdikdən sonra bu münaqişədən qaynaqlanan gərginlik yaşanıb.
Assambleyanın daha mühüm yaradıcı müzakirələr üçün nəzərdə tutulan mikrofonlarından səmərəsiz ittihamlar səsləndi. Tezliklə 75 yaşı tamam olacaq Avropa Şurasının tarixində iki üzv dövlət arasında heç vaxt bu qədər uzunmüddətli münaqişə olmayıb. Arzu edirik ki, belə münaqişə bir daha təkrarlanmasın. Ümid edirəm ki, növbəti sessiyada inkişaf hesabatında bir neçə məqam uğurla başa çatmış bu qarşılıqlı anlaşma və yaxınlaşma prosesinə həsr olunacaq”, - deyə R. Hüseynov qeyd edib.
O bildirib ki, iki ölkə arasında sülh müqaviləsinin bağlanması ən real perspektiv kimi görünür. Böyük sülhün bu həssas ərəfəsində Parlament Assambleyasının və ya digər platformadan münaqişənin uzadılmasına yönəlmiş hər hansı qızışdırıcı, riyakar hərəkət edənlər özlərini ifşa etməklə Ermənistanın və Azərbaycanın, ədalətin və həqiqətin tərəfdarı olmadıqlarını nümayiş etdirəcəklər.
Sonda azərbaycanlı deputat bildirib ki, Azərbaycan Prezidenti İlham Əliyevin Gürcüstana işgüzar səfəri zamanı qeyd etdiyi kimi, Cənubi Qafqazda sülhün bərqərar olmasının vaxtı çatıb. Azərbaycanın aidiyyəti qurumlarının rəhbərləri Gürcüstanda Ermənistanla təşkil ediləcək həm ikitərəfli, həm üçtərəfli görüşə gəlməyə hazırdırlar.
Şəhla Ağalarova
AZƏRTAC-ın xüsusi müxbiri
Strasburq
Bölmənin digər xəbərləri
