Çexiya hakimiyyəti etiraz aksiyaları keçirmək istəyən fermerlərin tələblərini təmin etməyə çalışır
Bakı, 3 mart, AZƏRTAC
Çexiya hakimiyyəti etiraz aksiyaları keçirmək istəyən fermerlərin tələblərini təmin etməyə çalışır və onların həyatlarını yaxşılaşdırmaq üçün dövlət büdcəsindən əlavə məbləğ ayıracaq.
AZƏRTAC xəbər verir ki, bu barədə “Mlada fronta Dnes” qəzeti ölkənin Kənd Təsərrüfatı Nazirliyinə istinadən məlumat yayıb.
Çex fermerlərinin ən böyük assosiasiyaları hökumətin onların iqtisadi tələblərini təmin etməsə, martın 7-də Praqada etiraz aksiyası keçirəcəkləri barədə xəbərdarlıq ediblər. Nazirlər Kabineti buna reaksiya verərək, 2024-cü ildə heyvandarlıq təsərrüfatlarına maliyyə dəstəyinin artırılması ilə bağlı qərar qəbul edib. Fermerlərə dövlət büdcəsindən ayrılması nəzərdə tutulan məbləğ iki dəfə, təxminən 24 milyon dollar artırılıb. Rəsmilər 2025-ci ildə kənd təsərrüfatı işçilərinə 88 milyon ABŞ dolları məbləğində sosial sığorta endirimləri etmək qərarına da gəliblər ki, bu da kənddə məşğulluğu stimullaşdıracaq. Həmçinin kiçik və orta fermer təsərrüfatlarına 132 milyon ABŞ dolları həcmində investisiya dəstəyinin göstərilməsi planlaşdırılır.
Fermerlər qərarlarını bazar ertəsi elan edəcəklər.
Çexiyada fevralın 19-da və 22-də fermerlərin etiraz aksiyaları keçirilib. Fermerlər şəhərlərin küçələrinə və respublikanın qonşu dövlətlərlə quru sərhədlərindəki keçid məntəqələrinə 2 mindən çox kənd təsərrüfatı texnikası gətiriblər.
Bölmənin digər xəbərləri
