DÜNYA
Çexiya Prezidenti: Terrorizm bütün təzahürlərində yalnız nifrətə səbəb olur
![Çexiya Prezidenti: Terrorizm bütün təzahürlərində yalnız nifrətə səbəb olur](/files/2024/1/1200x630/17114461711911910615_1200x630.jpg)
Praqa, 26 mart, AZƏRTAC
Çexiya Prezidenti Pyotr Pavel “ČTK” milli informasiya agentliyi üçün şərhində terrorizmə nifrət etdiyini bildirib.
AZƏRTAC xəbər verir ki, jurnalistin Moskva vilayətində “Crocus City Hall”da törədilmiş terror hücumu ilə bağlı sualına cavabında o deyib: “Terror aktının arxasında kimin durması və hansı motivləri rəhbər tutduğundan asılı olmayaraq, terrorizm bütün təzahürlərində yalnız nifrətə səbəb olur. Baş verənlərin istintaqının siyasi məqsədlər üçün sui-istifadə edilməməsi və əsl günahkarların, eləcə də onların motivlərinin müəyyənləşdirilməsi çox vacibdir”.
Xatırladaq ki, martın 22-də müasir Rusiyada baş verən ən dəhşətli terror aktlarından biri nəticəsində 137 nəfər həlak olub, 180-dən çox insan yaralanıb, onlardan 97-si, son məlumatlara görə, xəstəxanalarda qalır.
Həftə sonu Çexiya Senatının sədri Miloş Vıstrçil və Xarici İşlər Nazirliyi, həmçinin Çexiya hökumətinin başçısı Pyotr Fiala Rusiyada törədilmiş terror aktını pisləyiblər. Terror hücumunu Çexiya Deputatlar Palatasının spikeri Marketa Pekarova-Adamova da pisləyib. Siyasətçilər həlak olanların ailələrinə başsağlığı veriblər.
Vüqar Seyidov
AZƏRTAC-ın xüsusi müxbiri
Praqa