Çin dövlət qurumları üçün “Windows” dəstəyini dayandırır
Bakı, 20 avqust, AZƏRTAC
Pekin dövlət qurumları üçün nəzərdə tutulmuş “Microsoft” şirkətinin “Windows” əməliyyat sisteminin köhnə versiyasına dəstəyi vaxtından əvvəl dayandırır.
AZƏRTAC xəbər verir ki, bu barədə “Bloomberg” agentliyi mənbələrinə istinadən yazıb.
Çinin Dövlət Təhlükəsizliyi Nazirliyi dövlətlə əlaqəli bəzi təşkilatlara kompüterlərində “Windows 10” əməliyyat sisteminin modifikasiya edilmiş versiyasını silmək göstərişi verib.
“Windows”un bu versiyası “Microsoft” və “China Electronics Technology” dövlət şirkətinin birgə müəssisəsi olan “C&M Information Technologies” (CMIT) tərəfindən hazırlanıb. “CMIT” “Windows”un istifadədən çıxarılmasını 2027-ci ilin fevralında həyata keçirməyi planlaşdırırdı, lakin bunu vaxtından əvvəl edib. Bu qərar şirkətin özü üçün də gözlənilməz olub.
“Pekinin bu göstərişinə səbəb məlumatların təhlükəsizliyi ilə bağlı narahatlıqlar olub, lakin konkret hansı potensial zəif yerlərin Çin rəsmilərini narahat etdiyi dəqiqləşdirilməyib”, – deyə agentlik yazıb.
Avqustun ortalarında “Microsoft”un Çindəki fəaliyyətini məhdudlaşdırdığı məlum olub. “Reuters” agentliyi xəbər verib ki, “Microsoft” Çində ən azı 15 filial və birgə müəssisəsini bağlayıb.
Bölmənin digər xəbərləri
