DÜNYA
Çin yarımkeçirici istehsalında istifadə olunan materialların ixracına qadağa qoyub
![Çin yarımkeçirici istehsalında istifadə olunan materialların ixracına qadağa qoyub](/files/2023/2/1200x630/16884697286366111141_1200x630.jpg)
Pekin, 4 iyul, AZƏRTAC
Çin yarımkeçirici istehsalında istifadə olunan iki nadir metalın ixracına qadağa qoyub.
AZƏRTAC xəbər verir ki, Çinin Kommersiya Nazirliyi ölkənin milli təhlükəsizliyini və maraqlarını təmin etmək məqsədilə avqustun 1-dən etibarən tərkibində qallium və germanium olan sənaye məhsullarının və materiallarının ixracını dayandıracaq. Ölkənin ixrac nəzarəti, xarici ticarət və gömrük qanunlarını əsas götürülərək verilmiş qərara əsasən, tərkibində sözügedən metalların olduğu məhsul və materialların ixracı icazəsiz mümkün olmayacaq.
Qeyd edək ki, dünya bazarındakı qallium və germaniumun böyük hissəsi Çinə məxsusdur.
Çinin bu qərarı ABŞ-ın Çinə yarımkeçirici ixracına tətbiq etdiyi qadağadan sonraya təsadüf edir. Ötən ilin oktyabrında Bayden administrasiyası Çində hərbi məqsədlər üçün istifadə olunması iddiası ilə bəzi mikrosxemlərin Çinə ixracının məhdudlaşdırılması barədə qərar qəbul edib. Vaşinqton çip istehsalı avadanlığı üzrə lider ölkələr olan Niderland və Yaponiyadan xahiş edib ki, onun Çinin qabaqcıl mikrosxemlərə çıxışını azaltma planlarına qoşulsun. Yanvarda Niderland və Yaponiya Çinin hərbi potensialını modernləşdirmək və süni intellekt sahəsini inkişaf etdirmək üçün istifadə edə biləcəyi qabaqcıl texnologiyaların bu ölkəyə ixracını azaltmaq məqsədilə Birləşmiş Ştatlara qoşulmağa razı olublar.
Şahin Cəfərov
AZƏRTAC-ın xüsusi müxbiri
Pekin