Çində ali qanunverici orqanın illik iclası keçirilir
Pekin, 5 mart, AZƏRTAC
Pekində 13-cü çağırış Ümumçin Xalq Nümayəndələri Yığıncağının (ÜXNY) ilk sessiyası işə başlayıb.
AZƏRTAC xəbər verir ki, 15 gün davam edəcək sessiyada ölkə həyatının müxtəlif sahələrinə aid məsələlərlə bağlı müzakirələr aparılacaq, müvafiq qərarlar qəbul olunacaq, hökumətin hesabatı təqdim ediləcək. Bundan başqa, builki iclasda növbəti 5 il üçün Çin Xalq Respublikasının sədri və onun müavini, Dövlət Şurasının (Nazirlər Kabineti) sədri və Şuranın digər üzvləri müəyyənləşəcək.
Çində dövlət hakimiyyətinin ali orqanı olan Ümumçin Xalq Nümayəndələri Yığıncağı dövlətin qanunverici funksiyalarını həyata keçirir, ölkə həyatının mühüm sahələrinə dair qərarlar qəbul edir. ÜXNY Çin Xalq Respublikasının Sədrini və onun müavinlərini, Mərkəzi Hərbi Şuranın, Ali Xalq Məhkəməsinin sədrlərini və Ali Xalq Prokurorluğunun baş prokurorunu seçir, Dövlət Şurasının (Nazirlər Kabineti) sədrini və Şuranın digər üzvlərini təsdiq edir.
Ümumçin Xalq Nümayəndələri Yığıncağının hər çağırışının səlahiyyət müddəti 5 ildir. Yığıncağın sessiyaları ildə bir dəfə çağırılır. Sessiyalararası müddətdə ÜXNY-nin funksiyalarını onun Daimi Komitəsi həyata keçirir.
Çində, həmçinin Ümumçin Siyasi Məşvərət Şurasının illik iclası da keçirilir.
Şahin Cəfərov
AZƏRTAC-ın xüsusi müxbiri
Pekin
Bölmənin digər xəbərləri
