ÇİNGİZ ABDULLAYEVİN “MÜQƏDDƏS OLMAQ İSTƏYİ” ADLI ROMANI NƏŞR OLUNMUŞDUR

06.05.2004 [13:00]
Çap et
A⁺ A^-

AZƏRTAC-ın müxbiri xəbər verir ki, Azərbaycan yazıçılarının XI qurultayı ərəfəsində “Adiloğlu” nəşriyyatı Çingiz Abdullayevin “Muqəddəs olmaq istəyi” romanını nəşr etmişdir.

Tanınmış yazıçımızın şöhrət qazanmış və dünyanın bir çox ölkələrində dəfələrlə nəşr edilmiş əsərlərindən olan bu romanda 1974-cü ildə SSRİ Dövlət Təhlükəsizlik Komitəsinin sədri Yuri Andropovun təşəbbüsü ilə yaradılmış xüsusi təyinatlı “Oktava” qrupunun fəaliyyətindən danışılır.

İmperiya dağılandan sonra çox şeyi bildiklərindən azərbaycanlı general Məcidovun başçılıq etdiyi həmin qrupun üzvləri arzuolunmaz şahidlərə çevrildiyindən onları fiziki cəhətdən məhv etmək qərara alınır. Romanın süjet xətti də bu məcrada cərəyan edir.

Reallıqla səsləşən hadisələrlə zəngin, kəskin süjet xəttinə malik bu romanı ana dilimizə Qardaşxan Əzizxanlı çevirmişdir.