COP29 Azərbaycana beynəlxalq iqlim əməkdaşlığında əsas oyunçu kimi yeni status verəcək RƏY
Bakı, 21 dekabr, AZƏRTAC
Gələn il Azərbaycan BMT-nin İqlim Dəyişikliyi üzrə Çərçivə Konvensiyasının Tərəflər Konfransının 29-cu (COP29) sessiyasına ev sahibliyi etməklə yenidən dünyanın diqqət mərkəzinə çevriləcək. Bu, təkcə dünya ictimaiyyətinin diqqətini cəlb etməyəcək, həm də Azərbaycana beynəlxalq iqlim əməkdaşlığında əsas oyunçu kimi yeni status verəcək.
Bu fikirləri AZƏRTAC-a açıqlamasında beynəlxalq əlaqələr üzrə ekspert Masil Dəmirov söyləyib.
Onun sözlərinə görə, dünya ictimaiyyətinin etimadının və Azərbaycanın beynəlxalq səviyyədə hazırkı uğurunun ilk göstəricilərindən biri də məhz Ermənistanın və Bolqarıstanın Azərbaycanın xeyrinə öz namizədliyini geri götürməsidir: “COP29-un ölkəmizdə keçirilməsi yüksək siyasi əhəmiyyət kəsb edir və təkcə Azərbaycan üçün deyil, həm də region ölkələri üçün müəyyən çağırışlar və imkanlar yaradır. Bu tarixi hadisə ölkənin iqlim dəyişikliyi ilə mübarizədə qətiyyətini vurğulamaqla yanaşı, onun davamlı inkişaf üçün qlobal strategiyaların formalaşdırılmasında iştirakı istiqamətində yeni imkanlar açacaq. Bu tədbirin əhəmiyyətini və məsuliyyətini nəzərə alaraq, cari il dekabrın 15-də COP29-un ölkəmizdə keçirilməsi ilə əlaqədar Prezident İlham Əliyevin sədrliyi ilə müşavirə keçirilib. Bu, bir daha onu göstərir ki, ölkə Prezidenti Azərbaycanın nüfuzunun yüksəldilməsi istiqamətində var gücünü daim səfərbər edir, xalqımızın gələcək təminatı üçün tarixi addımlar atır”.
Masil Dəmirov deyib ki, strateji geosiyasi mövqeyinin və enerji sektorunda aktiv rolunun unikal kombinasiyası ilə Azərbaycan iqlim dəyişikliyi ilə qlobal mübarizədə mühüm oyunçu kimi çıxış edir. Azərbaycanın İqlim Dəyişikliyi Konfransına töhfəsi üçün potensialının və perspektivlərinin geniş olduğunu qeyd edən ekspert deyib: “Ölkəmizdə bu tədbirin təşkili müəyyən siyasi motivlərlə bağlıdır. Əsas siyasi motivlərdən biri ölkənin davamlı inkişaf sahəsində qlobal birliyə sadiqliyini nümayiş etdirməsidir. İstixana qazlarının emissiyalarının azaldılması və bərpaolunan enerji mənbələrindən istifadənin təşviqi üzrə qlobal təşəbbüslərdə fəal iştirak, Azərbaycanın karbon izlərini azaltmaq və qlobal səylərə töhfə vermək niyyətini vurğulayır”.
Enerji diversifikasiyası siyasətini digər mühüm amil kimi dəyərləndirən ekspert əlavə edib: “Təbii ehtiyatlarla zəngin olan Azərbaycan günəş və külək enerjisi kimi alternativ enerji mənbələrini də fəal şəkildə inkişaf etdirir. Bu, təkcə emissiyaların azaldılmasına kömək etmir, həm də ölkənin neft və qaz qiymətlərindəki dəyişikliklərə qarşı dayanıqlığını artırır. Bu strategiyalar təbii ki, Azərbaycanın iqlimlə bağlı tədbirlərə ev sahibliyi etmək üçün cəlbedici namizədə çevirir. COP29-un Azərbaycanda təşkili həm də ölkənin Qafqaz və Xəzər dənizi regionunda iqlim məsələlərinin müzakirəsi və əlaqələndirilməsi mərkəzinə çevrilmək potensiyalını əks etdirir. Bu təşəbbüs ölkələr arasında təcrübə və qabaqcıl texnologiyaların mübadiləsinə, onların davamlı inkişaf sahəsində əməkdaşlığının gücləndirilməsinə kömək edir”.
M.Dəmirovun sözlərinə görə, Azərbaycanın COP-a verdiyi töhfələr həm ölkənin strateji maraqlarını, həm də planetin davamlı gələcəyini təşviq etmək üçün qlobal ehtiyacları nəzərə alaraq iqlim problemlərinə balanslaşdırılmış yanaşmanı əks etdirir.
Azərbaycanın bölgədəki siyasi statusunun da çox mühüm rol oynadığını deyən ekspert bildirib: “Ölkəmiz müxtəlif beynəlxalq təşəbbüslərin əsas iştirakçısıdır və strateji geosiyasi mövqeyə malikdir. Bəzi xarici media mənbələri Ermənistanın Azərbaycanın xeyrinə namizədliyini geri götürməsini Ermənistanın xoş niyyəti ilə əlaqələndirir. Təbii ki, bu qərarın şəffaf və sülhyönümlü motivlərinə inanmaq istəyi arzuolunandır. Əlbəttə, bu belə olsaydı, regionun gələcəyi üçün ciddi addım olardı. Amma təəssüflər olsun ki, təcrübə və Ermənistan siyasətinin real mənzərəsi göstərir ki, xoş niyyət Ermənistanda aparıcı həlqə deyil. Real təhlil etsək görərik ki, Ermənistanın belə ciddi tədbirlər keçirməsi üçün potensialı yoxdur. Məhdud iqtisadi resurslara malik Ermənistan enerji infrastrukturunda çətinliklərlə üzləşir. Regional münaqişələr və geosiyasi gərginlik şəraitində ölkə iri beynəlxalq tədbirlərin təşkilində əlavə çətinliklərlə üzləşə bilər. Azərbaycan isə enerji lideri kimi alternativ enerji mənbələri sahəsində inkişaf etmiş infrastruktura və təcrübəyə malikdir ki, bu da “yaşıl” tədbirlərin təşkilini asanlaşdırır. Daha böyük və sabit iqtisadiyyata malik Azərbaycan irimiqyaslı konfransların təşkili ilə bağlı maliyyə tələblərinin öhdəsindən daha rahat gələ bilər. Azərbaycanın siyasi sabitliyi və beynəlxalq dialoqlarda fəal iştirakı ölkəmizi COP üçün daha cəlbedici məkana çevirir. Ermənistan isə öz növbəsində, Azərbaycanın mövcud siyasi və geosiyasi dinamika fonunda ciddi tədbirlər təşkil etməkdə çətinliklərlə üzləşə bilər”.
Ekspert qeyd edib ki, COP29-un Azərbaycanda keçirilməsi təkcə siyasi baxımdan əhəmiyyətli olmayacaq, həm də regional ekoloji infrastrukturun inkişafına töhfə verəcək. Bu, ölkənin regionda ekoloji ekspertiza və texnoloji inkişaf mərkəzinə çevrilməsinə imkan verəcək. Azərbaycan COP29-a ev sahibliyi etməklə nəinki dünyada siyasi əhəmiyyətini artırır, həm də iqlim dəyişikliyi ilə mübarizədə qlobal liderlər sırasına fəal şəkildə qoşulur. Bu tədbir ölkə tarixinə mühüm hadisə kimi düşərək, Azərbaycanın innovasiyalara, əməkdaşlığa sadiqliyini və planetimiz üçün davamlı gələcəyin formalaşdırılmasında fəal rolunu vurğulayacaq.
Bölmənin digər xəbərləri
