Daşkənddəki Əlişir Nəvai adına Universitetdə “Addım-addım Özbəkistan” kitabının təqdimatı olub VİDEO
Daşkənd, 29 oktyabr, АZƏRTAC
Azərbaycan Milli Məclisinin Mədəniyyət komitəsinin sədri Qənirə Paşayevanın rəhbərliyi ilə Azərbaycan nümayəndə heyəti Daşkənddəki Əlişir Nəvai adına Özbək Dili və Ədəbiyyatı Universitetindəki Məhəmməd Füzuli adına Mədəniyyət, Təhsil və Tədqiqatlar Mərkəzində olublar.
AZƏRTAC xəbər verir ki, mərkəz Özbəkistandakı Heydər Əliyev adına Azərbaycan Mədəniyyət Mərkəzinin (AMM) təşəbbüsü ilə yaradılıb.
Əvvəl Qənirə Paşayeva və digər nümayəndələr mərkəzdə yaradılan şəraitlə tanış olublar.
Universitetin prorektoru, professor Baxodir Xalikov qonaqları salamlayaraq ölkələrimiz arasında mədəni-humanitar sahədə əlaqələrin inkişafından danışıb. Prorektor bildirib ki, universitet cəmi bir neçə il əvvəl yaradılıb, buna baxmayaraq qısa müddətdə Özbəkistanın ali məktəbləri arasında hörmət qazana bilib.
Qənirə Paşayeva özbək xalqını və özbək ədəbiyyatını çox sevdiyini, bu xalqın şairlərini mütaliə etdiyini, onlar haqqında məqalələr yazdığını deyib. O, Özbəkistanın Türkdilli Dövlətlərin Əməkdaşlıq Şurasına üzv olmasını sevinclə qarşıladığını diqqətə çatdırıb. Deputat bildirib ki, Daşkənddəki Heydər Əliyev adına Azərbaycan Mədəniyyət Mərkəzi Azərbaycanın şair və yazıçılarının əsərlərini özbək dilində çap etdirir və bu, təqdirəlayiq haldır: “Mən burada AMM-nin çap etdirdiyi kitabları da görürəm”.
AMM-nin direktoru Samir Abbasov bildirib ki, Mədəniyyət Mərkəzi bu qurumu lazımı kitab və digər avadanlıqlarla təchiz edib. Tələbələr bu mərkəzdə Azərbaycan ədəbiyyatı, mədəniyyəti, tarixi ilə tanış olurlar. Buradakı kitablardan istifadə edərək Azərbaycan ədəbiyyatı və mədəniyyəti ilə bağlı tədqiqatlar aparırlar.
Mərkəzin rəhbəri, dosent Gülbahar Aşurova belə bir mərkəzin yaradılması üçün Azərbaycan Mədəniyyət Mərkəzinə minnətdarlıq edib, burada keçirilən tədbirlər və gələcək planlardan söhbət açıb.
Sonra universitetdə Qənirə Paşayevanın Bakıda çap olunan “Addım-addım Özbəkistan” kitabının təqdimatı keçirilib.
Universitetin professoru Səadət Muxammedova kitabın məziyyətlərindən danışıb, toplunun tələbələr üçün maraq kəsb edəcəyini bildirib.
Baxodir Xalikov özbək və Azərbaycan xalqlarının, həmçinin yazıçı və şairlərimizin dostluğu, AMM ilə həyata keçirilən birgə layihələrdən söhbət açıb. O əmin olduğunu bildirib ki, “Addım-addım Özbəkistan” toplusu tələbələrin sevimli kitablarından olacaq.
Özbəkistan Yazıçılar İttifaqının katibi Qayrat Məcid bildirib ki, zaman-zaman Azərbaycan ədəbiyyatı nümunələri özbək, özbək ədəbiyyatı seçmələri Azərbaycan dilinə çevrilib və bu proses indi də davam edir. Bu işdə Heydər Əliyev adına Azərbaycan Mədəniyyət Mərkəzinin fəaliyyəti xüsusi qeyd olunmalıdır. Mədəniyyət Mərkəzi Azərbaycan ədəbiyyatı, mədəniyyəti, tarixi ilə bağlı Daşkənddə özbək dilində 90-a yaxın kitab çap etdirib və bu, təqdir olunmalıdır.
Q. Məcid deyib ki, Azərbaycan Milli Məclisinin deputatının Özbəkistan haqqında kitab yazması dostluğumuzun və qardaşlığımızın təcəssümüdür.
Direktor Samir Abbasov Azərbaycanın və Özbəkistanın müstəqilliklərinin 30 illiyindən danışıb, bu illər ərzində həm Azərbaycanın, həm də Özbəkistanın böyük layihələrə imza atdığını bildirib. O deyib ki, böyük şairlər Nizami Gəncəvi və Əlişir Nəvai ilə başlayan ədəbi əlaqələrimiz bu gün də davam edir. O, Özbəkistanın ali məktəbləri ilə Azərbaycanın universitetləri arasında müəllim və tələbə mübadiləsinin əhəmiyyətindən danışıb.
Direktor qeyd edib ki, böyük Nizami Gəncəvinin “Xəmsə”si Özbəkistanda ilk dəfə çap olunub və böyük maraq doğurub. O, təqdim olunan kitabın əhəmiyyətindən danışıb, topluda bu ölkənin tanınmış şəxsiyyətləri, ziyarətgahları haqqında məlumat verildiyini diqqətə çatdırıb.
Gülbahar Aşurova Qənirə Paşayevanın bir şair, nasir və publisist kimi yaradıcılığından danışıb, əsərlərinin mühüm əhəmiyyət kəsb etdiyini deyib.
Qənirə Paşayeva çıxışında Əlişir Nəvainin adını daşıyan universitetdə “Addım-addım Özbəkistan” kitabının təqdimatının keçirilməsindən məmnunluğunu ifadə edib. Deputat deyib ki, türk dünyasını azman ağaca bənzətsək, mənim kitabım Özbəkistanın zəngin tarixi, mədəniyyəti, ədəbiyyatının bir yarpağıdır. Kitabda Azərbaycan və özbək xalqlarının böyük oğlu, şair, tərcüməçi, müəllim Maqsud Şeyxzadə, Azərbaycanın Əməkdar artisti Kövkəb Əliyeva, şair İxtiyar Rza, heykəltəraş Eynulla Əliyev və digər soydaşlarımız haqqında da söhbət açılır.
Komitə sədri 30 il Ermənistanın işğalı altında olan Qarabağın azad olunmasından da danışıb, şəhərlərimizin, kəndlərimizin, məscid və ziyarətgahlarımızın dağıdıldığını, yerlə-yeksan olunduğunu diqqətə çatdırıb. Vurğulanıb ki, artıq azad edilən torpaqlarımız məkrli ermənilərin basdırdığı minalardan təmizlənir və quruculuq işlərinə başlanıb. Bu ərazilərdən köçkün düşən vətəndaşlarımızın öz dədə-baba torpaqlarına dönəcəyi gün isə çox da uzaqda deyil.
Deputat kitabın təqdimatını keçirdikləri üçün universitetin rəhbərliyinə minnətdarlıq edib.
Qulu Kəngərli
AZƏRTAC-ın xüsusi müxbiri
Daşkənd
Bölmənin digər xəbərləri
