DAXİLİ İŞLƏR NAZİRLİYİ VƏ RESPUBLİKA BAŞ PROKURORLUĞU MƏTBUAT XİDMƏTLƏRİNİN MƏLUMATI
Bununla əlaqədar aparılan istintaq hərəkətləri və əməliyyat-axtarış tədbirləri ilə baş vermiş ağır cinayət hadisəsinin bir sıra təfərrüatları müəyyən edilmişdir. Belə ki, həmin gün xidməti vəzifələrini yerinə yetirən polis zabitləri Rövşən Rəhimov, İlqar Ağayev və polis nəfəri Teymur Yusifli Nardaran qəsəbəsinin ərazisindən keçərkən, qəsəbə sakini Hənifə Quliyev onları saxlayaraq təhqir etmiş və polis əməkdaşlarını öldürməyə təhrik edən çağırışlar etmişdir. İstintaqla müəyyən olunmuşdur ki, hadisədən bir qədər əvvəl spirtli içki qəbul etmiş qəsəbə sakinləri Ramiz Həsənov, Həsən Əzimov, İlham Quliyev və başqaları bu çağırışa cavab olaraq, qanunsuz əldə edib gəzdirdikləri müxtəlif markalı tapançalardan və avtomat silahdan atəş açmaqla polis əməkdaşlarının üzərinə hücum etmişlər. Onlar əlbəyaxa olduqları Rövşən Rəhimovu yerə yıxmış, Ramiz Həsənov isə xüsusi amansızlıq göstərərək tapançadan polis əməkdaşının baş nahiyəsinə atəş açıb onu qəsdən öldürmüşdür. Cinayətin iştirakçılarından olan İlham Quliyev və digərləri polis nəfəri Teymur Yusiflini vuraraq ona xəsarət yetirmiş, Həsən Əzimov isə tapançanı onun başına dirəyərək atəş açmağa cəhd göstərmişdir. Bu ictimai təhlükəli əməlin qarşısını almaq məqsədi ilə polis leytenantı İlqar Ağayev xidməti silahını tətbiq edərək Ramiz Həsənovu məhv etmiş, Həsən Əzimovu və İlham Quliyevi isə ayaq nahiyəsindən yaralamışdır.
Hadisə yerində hücum edənlərin silahlı tərəfdarlarının çoxalmasına baxmayaraq, polis leytenantı İlqar Ağayev vəzifə borcunu qəhrəmancasına sonadək yerinə yetirmişdir. O, odlu silahdan açılmış atəşlə özünün də ağır yaralandığını başa düşərək, xidməti silahını və cinayətkarlardan götürdüyü “Makarov” tapançasını Teymur Yusifliyə verib hadisə barədə xəbərdar etmək üçün onu polis bölməsinə göndərmişdir. Bundan sonra cinayətkar qrupun üzvlərinin tapança və avtomat silahlardan açdıqları atəşlər nəticəsində İlqar Ağayev də həlak olmuşdur.
İstintaq araşdırmaları ilə Ramiz Həsənovun, Həsən Əzimovun və İlham Quliyevin “Naqan”, “Makarov”, “TT” markalı tapançaları və avtomat silahı qanunsuz əldə etmələri və gəzdirmələri tam sübuta yetirilmiş, habelə polis əməkdaşlarının qətlə yetirilməsində bilavasitə iştirak etmiş Zülfü Həsənov, Faiq Zəkiyev, Famil Abbasov və başqaları müəyyən olunaraq axtarışa elan edilmişlər.
Həmin şəxslərin tutulması məqsədi ilə 2006-cı il fevralın 7-də Daxili İşlər Nazirliyi xüsusi qurumu tərəfindən əməliyyat keçirilmişdir. Əməliyyat zamanı onlar, eləcə də hadisə yerində olmuş İsmayıl Mürsəlov, Yaşar Cəbrayılov, Fikrət Saramanov, Seyidazər Mehdiyev polisə fiziki müqavimət göstərmiş, hakimiyyət nümayəndələrinə xəsarət yetirilməsinə cəhd edərək əməliyyat qrupu üzvlərinin üstünə əl qumbarası atmışlar. Partlayış nəticəsində xidməti vəzifələrini yerinə yetirən 6 polis əməkdaşı və müqavimət göstərənlərdən bir neçəsi müxtəlif dərəcəli bədən xəsarətləri almışdır. Bununla belə, Zülfü Həsənov və yuxarıda adları çəkilən 6 nəfər zərərsizləşdirilərək tutulmuşlar.
Cinayətin bütün xüsusatlarının araşdırılması və digər iştirakçılarının məsuliyyətə cəlb olunması üçün istintaq-əməliyyat tədbirlər davam etdirilir.
Bölmənin digər xəbərləri
