Deputat: Dövlətimiz tərəfindən vaxtında atılan addımlar nəticəsində ölkəmizdə koronavirusa yoluxmalar minimum həddədir
Bakı, 4 aprel, AZƏRTAC
Bu gün kainatımız, eyni zamanda, ölkəmiz insanların sağlamlığını təhdid altına alan yeni qlobal pandemiya - koronavirus (COVID-19) infeksiyası ilə mübarizə aparır. Tibbin, texnologiyanın inkişafının pik həddə çatdığı bir dövrdə bəşəriyyət öz tarixi boyu ən ağır bəlalardan biri ilə üzləşdi, infeksiyanın yayılması tamamilə nəzarətdən çıxdı. XXI əsrin bəlasına çevrilən virus səbəbindən dünya ölkələri bir-birlərinə qapılarını bağladı, iqtisadi əlaqələr məhdudlaşdırıldı, beynəlxalq tədbirlər təxirə salındı. Ən çətin sınaqlardan, təbii fəlakətlərdən, iqtisadi böhranlardan çıxış yolu tapan insanlar dünyaya meydan oxuyan bu qorxunc kabusun ağır sınağı qarşısında əlacsız qalıblar.
Bu sözləri AZƏRTAC-a açıqlamasında deputat Pərvin Kərimzadə bildirib. Deputat qeyd edib ki, ölkəmizdə ilk gündən təhlükəli koronavirus (COVID-19) infeksiyasının yayılmasının qarşısının alınması, vətəndaşlarının təhlükəsizliyini təmin etmək məqsədilə hökumət tərəfindən məqsədyönlü, təxirəsalınmaz tədbirlər görülüb, Ümumdünya Səhiyyə Təşkilatının (ÜST) tövsiyələrinə əsaslanan maarifləndirmə işləri davam etdirilir.
Azərbaycan dövləti tərəfindən vətəndaşlarımızın təhlükəsizliyinin təmin edilməsi üçün vaxtında atılan qətiyyətli addımların, səhiyyə xidmətlərinin əlçatanlığı, gigiyena mədəniyyətinin yüksək olmasının nəticəsidir ki, ölkəmizdə koronavirusa yoluxmalar minimum həddədir.
Təəssüflər olsun ki, bəzən ictimai yerlərdə hökumətin müəyyənləşdirdiyi qaydalara riayət edilmədiyinin şahidi oluruq. Unutmayaq ki, görülən bütün təxirəsalınmaz tədbirlərlə yanaşı, hər birimizin üzərinə vətəndaşlıq məsuliyyəti düşür. Bu gün bizim bir nömrəli vəzifəmiz təlimatlara tam əməl etmək, Prezident İlham Əliyevin rəhbərliyi ilə həyata keçirilən tədbirlərə dəstək olmaq, sərhəd tanımayan COVID-19 infeksiyasına qarşı birlikdə mübarizə aparmaq olmalıdır.
“Düşünürəm ki, bir nəfər kimi mövcud təlimata uyğun hərəkət edərək evdə otursaq, sosial izolyasiya qaydalarına riayət etsək, təkcə özümüzün, ailəmizin, doğmalarımızın deyil, cəmiyyətimizin bütün üzvlərinin səhhətini qorumuş olar, ən başlıcası, dünyada böyük problemə çevrilən qlobal pandemiyanın ölkəmizdə yayılmasının qarşısını alarıq.
Bir halda ki, bu gözəgörünməz bəladan qorunmağın çıxış yolu müəyyən zaman ərzində evdə qalmaq, zərurət olmadıqda bayıra çıxmamaqdırsa, gəlin, pandemiyaya qarşı mübarizədə maksimum fəallıq göstərək.
İnanıram ki, hər zaman milli birlik nümayiş etdirən hər bir Azərbaycan vətəndaşı koronavirusla bağlı mübarizədə də həmrəylik göstərərək, ölkəmizi qlobal pandemiya təhlükəsindən qoruyacaq”, - deyə deputat qeyd edib.
Bölmənin digər xəbərləri
