Dövlət Komitəsinin sədri Xocalı sakinlərinin suallarını cavablandırıb
Bakı, 29 sentyabr, AZƏRTAC
Qaçqınların və Məcburi Köçkünlərin İşləri üzrə Dövlət Komitəsinin sədri Rövşən Rzayev Xocalıdan məcburi köçkün düşmüş sakinlərin bir qrupu ilə görüşüb.
Komitədən AZƏRTAC-a bildirilib ki, görüşdə Prezident, Müzəffər Ali Baş Komandan İlham Əliyevin rəhbərliyi ilə 44 günlük Vətən müharibəsindən və bu günlər Qarabağ iqtisadi rayonu ərazisində aparılan birgünlük lokal antiterror tədbirlərindən sonra yaranan vəziyyət, işğaldan azad edilmiş ərazilərə Böyük Qayıdış üzrə I Dövlət Proqramında nəzərdə tutulan tədbirlərin icrası, doğma torpaqlara geri dönüş və perspektivlər barədə danışılıb. Antiterror tədbirləri nəticəsində separatçı dəstənin və onun yaratdığı qeyri-qanuni qurumun iflasa uğraması, bölgədə sülh və əmin-amanlıq üçün zəruri şəraitin yaradılması dərin məmnunluq hissi ilə qeyd edilib və bu tarixi nailiyyətə görə Prezident İlham Əliyevə təşəkkür bildirilib, torpaqlarımızın işğaldan azad edilməsi, həmin ərazilərdə dövlətimizin suverenliyinin təmin edilməsi uğrunda canından keçən şəhidlərin, həmçinin Xocalı soyqırımı qurbanlarının xatirəsi ehtiramla yad edilib.
Xalqımıza qarşı ağır cinayətlər törətmiş, Xocalı sakinlərini soyqırımına məruz qoymuş erməni quldurlarının tutulub ədalət mühakiməsinə verilməsi istiqamətində müvafiq dövlət qurumlarının zəruri tədbirlər həyata keçirdiyi vurğulanıb, amansız canilərin mütləq məsuliyyətə cəlb edilərək cəzalandırılacaqlarına inam ifadə olunub.
Məcburi köçkünlük dövründə dövlətdən daim diqqət və qayğı görən Xocalı sakinləri Prezident İlham Əliyevin, Birinci vitse-prezident Mehriban xanım Əliyevanın səmimi münasibətini və şəxsi dəstəyini yüksək dəyərləndiriblər. Qeyd edilib ki, işğaldan azad edilmiş ərazilərin dirçəlişi, bərpası və yenidən qurulması, Böyük Qayıdış proqramı üzrə tədbirlərin sürətlə həyata keçirilməsi, Xocalının bərpası və azərbaycanlı əhalinin ora geri dönüşü üçün imkanın yaranması böyük ruh yüksəkliyi doğurur.
Dövlət Komitəsinin sədri işğaldan azad edilmiş digər ərazilər kimi Xocalı rayonuna da qayıdışın səmərəli şəkildə təşkil olunması üçün başlanmış hazırlıq işləri, bununla bağlı dövlətimizin verdiyi tapşırıqlar barədə görüş iştirakçılarına ətraflı məlumat verib, onların fikir və mülahizələrini dinləyib, suallarını cavablandırıb.
Bölmənin digər xəbərləri
