DÖVLƏT TEATRLARINDA TƏMİR-BƏRPA İŞLƏRİ APARILACAQ
Təmir müddətində Azərbaycan Dövlət Akademik Opera və Balet Teatrının inzibati heyəti elə teatrın öz binasında çalışacaqdır. Teatrın simfonik orkestri Kamera və Orqan Musiqi Zalında, balet truppası Bakı Xoreoqrafiya Məktəbində, xor kollektivi isə Dövlət Filarmoniyasında işini davam etdirəcəkdir. Həmin kollektivlərin işinin əvvəlki qaydada təmin olunması üçün müvafiq şərait yaradılacaqdır. Başqa teatrlar isə Bakının müxtəlif mədəniyyət evlərində yerləşdiriləcəkdir. Azərbaycan Dövlət Akademik Milli Dram Teatrı Şəhriyar adına Mədəniyyət Mərkəzində, Azərbaycan Dövlət Gənc Tamaşaçılar Teatrı Səttarxan adına Mədəniyyət və Texnika Sarayında, Azərbaycan Dövlət Rus Dram Teatrı Xətai rayon Mədəniyyət Mərkəzində, Azərbaycan Dövlət Kukla Teatrı Nizami rayonu Keşlə qəsəbə Mədəniyyət Evində müvəqqəti fəaliyyət göstərəcəklər. Təmir müddətində teatrlar əsas fəaliyyətlərini səyyar tamaşalar, qastrol səfərləri üzərində quracaqlar. Dövlət teatrlarının peşəkarlıq səviyyəsinin və yaradıcılıq potensialının saxlanılması üçün kollektivlər Azərbaycan Dövlət Musiqili Komediya Teatrının, Dövlət Mahnı Teatrının və Heydər Əliyev adına Sarayın binalarında vaxtaşırı yeni tamaşalar göstərəcəklər.
Bölmənin digər xəbərləri
