Dubayda 4-cü Ümumdünya Polis Sammiti işinə başlayıb
Qahirə, 14 may, AZƏRTAC
Mayın 13-də Birləşmiş Ərəb Əmirliklərinin Dubay şəhərində 4-cü Ümumdünya Polis Sammiti işinə başlayıb.
AZƏRTAC xəbər verir ki, üç gün davam edəcək tədbirdə hüquq-mühafizə orqanlarının, beynəlxalq təşkilatların nümayəndələri və dünyanın müxtəlif ölkələrindən mütəxəssislər iştirak edirlər.
“Polis fəaliyyətinin gələcəyini formalaşdırmaq” şüarı altında keçirilən sammitdə müasir təhlükəsizlik çağırışları müzakirə olunur. Tədbirdə 300-dən çox beynəlxalq mütəxəssis və məruzəçi iştirak edir. Keçənilki tədbirlə müqayisədə iştirakçıların sayında 25% artım gözlənilir.
Builki sammit polis fəaliyyətinin gələcəyi ilə bağlı bir sıra mühüm mövzuları, o cümlədən kibertəhlükəsizlik, mütəşəkkil cinayətkarlığa qarşı mübarizə, süni intellektin polis əməliyyatlarında tətbiqi, ictimai təhlükəsizlik məsələlərini və yeni təhlükəsizlik çağırışlarını müzakirə edir. Sammitin məqsədi beynəlxalq əməkdaşlığı gücləndirmək və hüquq-mühafizə orqanları arasında ən yaxşı təcrübələrin mübadiləsini təşviq etməkdir.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
