CÜMHURİYYƏT - 100
Dubayda Azərbaycan Xalq Cümhuriyyətinin 100 illiyi ilə əlaqədar rəsmi qəbul keçirilib
Əbu-Dabi, 14 may, AZƏRTAC
Birləşmiş Ərəb Əmirliklərinin (BƏƏ) Dubay şəhərində Azərbaycan Xalq Cümhuriyyətinin 100 illiyi ilə əlaqədar rəsmi qəbul keçirilib.
AZƏRTAC xəbər verir ki, ölkəmizin Dubaydakı baş konsulluğunun təşkilatçılığı ilə keçirilən tədbirdə BƏƏ-nin yüksəkvəzifəli rəsmiləri, diplomatlar, soydaşlarımız və digər qonaqlar iştirak ediblər.
Tədbirdə əvvəlcə hər iki ölkənin dövlət himnləri səsləndirilib.
Azərbaycanın Dubay Əmirliyindəki baş konsulu Cavidan Hüseynov Azərbaycan Xalq Cümhuriyyətinin tarixi və fəaliyyəti haqqında məlumat verib. Prezident İlham Əliyevin Azərbaycan Xalq Cümhuriyyətinin 100 illiyinin dövlət səviyyəsində qeyd edilməsinə dair Sərəncamını xatırladan baş konsul bu sənədin dövlətçilik ənənələrimizə, tariximizə, milli kimliyimizə diqqətin bariz nümunəsi olduğunu bildirib. O qeyd edib ki, Cümhuriyyətin yaradılmasının 100-cü ildönümü ilə əlaqədar ölkəmizdə və xaricdə silsilə tədbirlər keçirilir.
Diplomat qeyd edib ki, mayın 28-də müsəlman Şərqində ilk parlamentli respublika olan Azərbaycan Xalq Cümhuriyyətinin yaranmasının 100 illiyi tamam olur və bu, Şərq dünyasında ilk azad, demokratik və dünyəvi dəyərlərə söykənən müstəqil respublika demək idi. Azərbaycan Xalq Cümhuriyyəti mövcudluğunun ilk günlərindən insanların bərabərliyi prinsiplərinə əsaslanaraq bütün ölkə vətəndaşlarına eyni hüquqlar verdi.
Baş konsul bildirib ki, 1991-ci ildə Azərbaycan xalqı ikinci dəfə müstəqilliyin bərpasına nail oldu. Ümummilli lider Heydər Əliyevin respublikada uğurla gerçəkləşdirdiyi siyasət Azərbaycan Prezidenti İlham Əliyev tərəfindən uğurla davam etdirilir. Prezident İlham Əliyevin 2018-ci ili Azərbaycan Respublikasında “Azərbaycan Xalq Cümhuriyyəti İli” elan etməsi və bu əlamətdar hadisənin dövlət səviyyəsində qeyd edilməsi 28 may tarixinə göstərilən diqqətin bariz təzahürüdür. Vurğulanıb ki, Azərbaycanın Birinci vitse-prezidenti xanım Mehriban Əliyeva da ölkəmizdə bütün mötəbər beynəlxalq tədbirlərin yüksək səviyyədə təşkilində, dinamik islahatların həyata keçirilməsində yaxından iştirak edir.
Diplomat, həmçinin qeyd edib ki, Azərbaycan müstəqilliyimizi tanıyan ilk dövlətlərdən biri olan BƏƏ ilə münasibətlərə böyük əhəmiyyət verir. Ölkələrimiz arasında səmimi dostluq münasibətləri mövcuddur və hər iki ölkə rəhbərliyinin siyasi iradəsi və əzmi sayəsində ikitərəfli əlaqələrimiz ildən-ilə daha da inkişaf edir. Son illərdə Birləşmiş Ərəb Əmirliklərindən Azərbaycana, eləcə də Azərbaycandan BƏƏ-yə səfər edən turistlərin sayında müşahidə olunan ciddi artım ölkələrimiz arasında mədəni, iqtisadi münasibətlərin inkişafının göstəricisidir.
Tədbirin rəsmi hissəsindən sonra ziyafət verilib, Azərbaycanın zəngin mətbəxi qonaqlara təqdim edilib.
Qəbul milli musiqilərimizdən ibarət konsert proqramı ilə başa çatıb.
Gecədə, həmçinin Azərbaycanın iqtisadi potensialı və turizm imkanları da sərgilənib.
Qonaqlara tarixi kitablar, mədəni dəyərlərimizi əks etdirən suvenirlər hədiyə olunub.
Asya Hacızadə
AZƏRTAC-ın xüsusi müxbiri
Əbu-Dabi