Dünya çempionluğuna iddialı 4 qolkiper
Bakı, 13 dekabr, AZƏRTAC
Qətərdə keçirilən futbol üzrə dünya çempionatının yarımfinal mərhələsində Xorvatiya, Argentina, Mərakeş və Fransa yığmaları mübarizə aparacaqlar. Hər dörd ölkənin yığma komandasının əsas oyunçuları, eləcə də qapıçıları üzərinə böyük məsuliyyət düşür. Əzmkarlıq, özünəinam və düzgün texnika sonda bir komandanın dünya çempionluğunu bayram etməsi ilə bitəcək.
AZƏRTAC mundialın yarımfinal mərhələsində mübarizə aparacaq əsas qapıçıları təqdim edir:
Emiliano Martines - Argentina
Yaş: 30
Millidə keçirdiyi oyun sayı: 24
“Qətər-2022”də seyvlərin sayı: 2
“Qətər-2022”də buraxılan qolların sayı: 5
E.Martines bir sıra yüksək texniki xüsusiyyətlərə malik futbolçudur. Qapıçı əsas heyətdəki yerini ötən il Amerika kuboku yarışındakı mükəmməl çıxışı ilə möhkəmləndirməyi bacarıb. E.Martines “Marakana” stadionunda Braziliya komandası üzərində 1:0 hesablı qələbədən əvvəl, yarımfinal matçının penalti seriyasında kolumbiyalı futbolçuların 3 topunu dəf etməyə nail olub.
Çərçivə qoruyucusu Qətərdə də gözəl oyunu ilə futbolsevərlərə həyəcan yaşadıb. O, mundialın dörddəbir final mərhələsində Niderland yığması ilə penalti seriyasında inamlı təsir bağışlayaraq komandada liderliyini bir daha təsdiqləyib. O, Argentinanın dörddəbir final matçında Niderland üzərində qələbəsində Vircil van Deyk və Steven Berqyesin zərbələrini mükəmməl dəf etməyi bacararaq qələbədə böyük pay sahibi olub.
Statistika:
Martines Argentina millisinin heyətində keçirdiyi 24 matçda yalnız 1 dəfə meydanı məğlub tərk edib. Bu, “Qətər-2022”nin qrup mərhələsində Səudiyyə Ərəbistanına 2:1 hesablı məğlubiyyət olub.
Bilirdinizmi?
Futbolçu Argentinanın “Mi Familia es un Dibujo” adlı cizgi filminin personajına bənzədiyinə görə “Dibu” ləqəbini alıb.
Sitat: “Emi bir fenomendir. O, dünyanın ən yaxşı qapıçılarından biridir” - futbol üzrə Argentina millisinin kapitanı Lionel Messi.
Dominik Livakoviç - Xorvatiya
Yaş: 27
Millidə keçirdiyi oyun sayı: 39
“Qətər-2022”də seyvlərin sayı: 2
“Qətər-2022”də buraxılan qolların sayı: 3
2018-ci il dünya çempionatında Xorvatiya millisinin qapıçısı Daniel Subaşiç Danimarka və Rusiya üzərində penaltilər seriyasında qazanılan qələbələrdə millinin qəhrəmanı olanda Dominik Livakoviç ehtiyat oyunçular skamyasında yer almışdı. “Qətər-2022”də isə D.Livakoviç əsas heyətdə meydana çıxıb. “Dinamo Zaqreb” klubunun qapıçısı Yaponiya və Braziliya üzərində penalti seriyasında mükəmməl oyunu ilə diqqəti üzərinə çəkməyi bacarıb. İki penalti seriyasında D.Livakoviçə qarşı 8 zərbədən yalnız üçü qolla tamamlanıb.
Penalti dramından əlavə, D.Livakoviç Xorvatiyanın turnirdə fərqlənən futbolçusu olub və mükəmməl seyvlər nümayiş etdirib. Onun atletik müdaxilələri Braziliyanın hücum edən super ulduzlarını dörddəbir final oyunu boyunca qapıdan uzaq tutmağa kömək etdi. Qapıçının 11 seyvi 2014-cü ildən sonra dünya çempionatları tarixində 1 qolkiperin etdiyi ən çox seyv kimi yadda qalıb.
Statistika:
Fransanın nüfuzlu idman qəzeti “L'Equipe” D.Livakoviçin Braziliyaya qarşı oyununu 10/10 reytinqə layiq görüb və nəşrin tarixində 15-ci futbolçu olub.
Bilirdinizmi?
Qapıçı Xorvatiya millisinin mundialın dörddəbir final matçında start heyətində ölkəsinin klubunda forma geyinən yeganə oyunçusu idi.
Sitat: “Dominik fantastik qapıçıdır və o, əla formadadır. O, Braziliyaya qarşı fərqli oyun nümayiş etdirdi. O, bizi xilas etmək üçün orada idi” - Xorvatiya millisinin baş məşqçisi Zlatko Daliç.
Uqo Loris - Fransa
Yaş: 35
Millidə keçirdiyi oyun sayı: 143
“Qətər-2022”də seyvlərin sayı: 0
“Qətər-2022”də buraxılan qolların sayı: 5
Böyük təcrübəyə malik Uqo Loris çıxışı ilə Fransa komandasına sakitlik, səlahiyyət və keyfiyyət gətirir. O, 1998-ci ildə dünya çempionatının qalibi olan həmyerlisi Lilian Tyuramı geridə qoyaraq ölkəsinin rekordçusu kimi “Qətər-2022”də tarix yazıb. “Tottenhem Hotspur”un qapıçısı mundialın dörddəbir final mərhələsində Fransa millisinin İngiltərə üzərində 2:1 hesablı qələbəsində klub yoldaşları Harri Keyn və Cud Bellinqhemdən seyvlər edərək özündən söz etdirməyi bacarıb.
Loris ardıcıl iki dünya çempionatında qalib gələn komandanın kapitanı olan ilk futbolçu adını qazanmağı hədəfləyir.
Statistika:
Loris Fransa yığmasının heyətində keçirdiyi 143 oyunda 62 qol vurub.
Bilirdinizmi?
Lorisin kiçik qardaşı Gautier Liqa ikidə çıxış edən “Le Havre” klubunun şərəfini qoruyur. İyirmi yeddi yaşlı futbolçu Fransa U-17 komandasında da forma geyinib.
Sitat: “Uqo komandamızın ürəyi və ruhudur. O, tarixə düşəcək və mən onunla fəxr edirəm” - Fransa seçməsinin hücumçusu Antuan Qrizmann.
Yassin Bunu - Mərakeş
Yaş: 31
Millidə keçirdiyi oyun sayı: 50
“Qətər-2022”də seyvlərin sayı: 3
“Qətər-2022”də buraxılan qolların sayı: 1
Yassin Bunu Mərakeş komandasının tarixinə düşən ulduz futbolçudur. “Sevilya” klubunun qapıçısı “Qətər-2022”də demək olar ki, məğlubedilməzdir. Qolkiperin İspaniya ilə matçdakı penalti seriyası uzun müddət yaddaşlarda qalacaq. Lakin onun ən möhtəşəm çıxışı Portuqaliya millisinə qarşı 1:0 hesablı qələbə olub. Portuqaliya yığmasının baş məşqçisi Fernando Santuşun taktiki gedişlərini və hücumçu Juan Feliksin mükəmməl zərbələrini dəf edən mərakeşli qapıçı yığmasının tarixdə ilk dəfə yarımfinala yüksəlməsində böyük pay sahibi olub.
Statistika:
2021-ci ilin martında futbolçu karyerasında ilk dəfə qol vurub. “Real Valyadolid” ilə La Liqa matçında “Sevilya”nın bərabərlik qoluna imza atıb.
Bilirdinizmi?
Bunu Kanadanın Monreal şəhərində mərakeşli ailəsində anadan olub. Üç yaşında Kasablankaya köçüb.
Sitat: “Bunun bədən dilindən onun özünə güvəndiyini, çox arxayın olduğunu görə bilərsiniz. O, öz bacarığına inanır” - nigeriyalı sabiq futbolçu Cey-Cey Okoça.
Bölmənin digər xəbərləri
