Bakı, 30 sentyabr, AZƏRTAC

Dünya çempionatında üç bürünc medal qazandım. Hamı bilir ki, ağırlıqqaldırmada medal əldə etmək digər idman növlərinə nisbətən daha çətindir. Düzdür, bütün idman növləri çətindir, amma bizdə medal uğrunda mübarizə daha ağırdır.

Bu sözləri AZƏRTAC-a açıqlamasında Səudiyyə Ərəbistanının paytaxtı Ər-Riyadda keçirilmiş dünya çempionatında üç bürünc medal qazanan Azərbaycan ağırlıqqaldıranı Dadaş Dadaşbəyli deyib.

109 kiloqram çəki dərəcəsində fəxri kürsünün üçüncü pilləsinə qalxan idmançı bildirib ki, ilk iki yerdən birinin tuta bilməməsinin səbəbi keçirdiyi ağır əməliyyatlar olub: “Qızıl və ya gümüş medal qazanacağıma ümidlər böyük idi. Ancaq buna nail ola bilmədim. Düşünürəm ki, səbəb iki dəfə ard-arda əməliyyat keçirməyim oldu. Yarışlara hazırlaşmağım üçün kifayət qədər zamanım olmadı. Buna baxmayaraq, çox yüksək nəticə əldə etdim. Karyeramdakı ən böyük uğura məhz son dünya çempionatında nail oldum. Qızıl və gümüş medal uğrunda mübarizədə çox az fərqlə uduzdum. İnanıram ki, məşqlərimin sayını artırsam, gələcəkdə qızıl medal qazana biləcəyəm”.

O, mübarizə apardığı qrupda kifayət qədər güclü idmançıların olduğunu xatırladıb: “Mənim çıxış etdiyim çəkidə idmançılar A və B qruplarına bölünmüşdülər. B qrupu nisbətən zəif olsa da, oradakı idmançılar da yüksək çəki qaldırmışdılar. A qrupunda iki Olimpiya, bir çox dünya və Asiya çempionları mübarizə aparırdı. Həddindən artıq güclü rəqiblərim var idi. Ümumiyyətlə, mənim bu yarışda medal qazanmaq şansımın olmadığını düşünürdülər. Lakin özümü tam hazır hiss edirdim. Etdiyim məşqlər öz nəticəsini verdi. Həm özüm, həm də məşqçilərim uğurlu nəticəyə inanırdıq. Yarışdan medalsız qayıtmayacağıma əmin idim”.

Milli komandanın baş məşqçisi Emil Əliyev jurnalistlərə açıqlamasında deyib ki, Dadaş Dadaşbəyli Azərbaycan ağırlıqqaldıranlarının flaqmanıdır. İdmançı mütəxəssisin fikirlərinə münasibət bildirmək istəmədiyini söyləyib: “Düşünürəm ki, idmançının özü ilə bağlı danışmağı düzgün olmaz. Yaşım az deyil. Diskvalifikasiya aldım və bir müddət idmandan uzaq qaldım. Daha sonra dizimdən və dirsəyimdən iki dəfə əməliyyat keçirdim, qolum sındı. Bütün bunlara baxmayaraq, yenə yola davam etdim. Sonda isə ən yaxşı nəticəni ortaya qoydum. Əgər özümə kənar bir şəxsin gözü ilə baxmaq imkanım olsaydı, deyərdim ki, ortaya mükəmməl iş qoydu”.

D.Dadaşbəylinin sözlərinə görə, “Paris-2024” Yay Olimpiya Oyunlarına lisenziya qazanıb-qazanmadığıma Dünya Kubokunda aydınlıq gələcək: “Altı əsas yarışımız var. Əməliyyata görə bu yarışlardan birinə çıxa bilməmişəm. Amma bu, mənim lisenziya əldə etməyimə maneə törətməyi üçün əsas faktor deyil. Dünya Kubokunun sonunda hər birimizə aydın olacaq ki, lisenziyaları kimlər əldə edib. Hazırda istənilən dünya çempionunun belə, bununla bağlı məlumatı yoxdur. Ağırlıqqaldırmada antidopinq qaydaları olduqca sərtdir. Qaydalar bütün yarışlarda iştirakı tələb edir”.

İdmançı əsas hədəfinin Olimpiya medalı qazanmaq olduğunu vurğulayıb: “Bunun üçün əlimdən gələni edəcəyəm. Qarşıda ilk yarışımız Qətərin paytaxtı Dohada keçiriləcək lisenziya xarakterli Qran-Pri olacaq. Nəticəmiz yüksək olmalıdır. Lisenziya yarışlarındakı nəticələrə xüsusi diqqət yetirilir. Daha sonra isə böyüklər arasında Avropa çempionatı və Dünya Kuboku yarışlarına qatılmağı planlaşdırırıq. Bacardığım qədər formamı saxlamağa çalışacağam. Bizdə idman formasını qoruyub-saxlamaq daha çətindir”.