Əbu-Dabidə fırıldaqçılıqda təqsirləndirilən “Qızıl imperiyası” adlı şirkətin qanunsuz əməlləri ifşa edilib
Qahirə, 16 mart, AZƏRTAC
Birləşmiş Ərəb Əmirliklərində (BƏƏ) qeydiyyatdan keçən və sosial şəbəkələr vasitəsilə dünyanın hər yerindən olan insanları aldadan saxta “Qızıl imperiyası” şirkətinin məhkəməsi olub.
AZƏRTAC “Emirates” informasiya agentliyinə istinadla xəbər verir ki, Filippin vətəndaşlarının təsis etdiyi şirkət çirkli pulların “yuyulması” və sosial şəbəkələrdə insanlardan qızıl ticarətinə sərmayə adı altında pul alınmasında ittiham edilib. Əbu-Dabi məhkəməsinin qətnaməsində müxtəlif ölkələrdən olan 4 min nəfərin bu cinayətkar şəbəkənin qurbanı olduğu qeyd edilib. Şirkətin dörd üzvünə 5 il müddətinə azadlıqdan məhrumetmə və 50 milyon dinar cərimə cəzası verilib. Bundan başqa, cinayətkarlardan 1 milyon 370 min dinar dəyərində 7 kiloqram 340 qram qızıl götürülərək müsadirə olunub.
BƏƏ-nin hüquq-mühafizə orqanları “Facebook” və digər sosial şəbəkələrdə “Gold Empire Management” adı altında açılmış səhifələrin abunəçilərinə müraciət edərək cinayətkar şəbəkənin fırıldaqları ilə bağlı əlavə məlumat verməyə çağırıb. Maliyyə piramidası şəbəkəsi quran şirkətin abunəçilərinə yeni insanları cəlb etmək müqabilində 1000 dinar mükafat vəd etdiyi və onların özlərindən də 2 min dinar üzvlük haqqı aldığı bildirilir.
Oqtay Bayramov
AZƏRTAC-ın xüsusi müxbiri
Qahirə
Bölmənin digər xəbərləri
