Ədliyyə Akademiyasında Xocalı faciəsinə həsr olunmuş tədbir keçirilmişdir
Bakı, 21 fevral (AZƏRTAC). Ədliyyə Nazirliyinin Ədliyyə Akademiyasında Xocalı faciəsinin 20-ci ildönümünə həsr olunmuş anım tədbiri keçirilmişdir.
Akademiyadan AZƏRTAC-a bildirmişlər ki, əvvəlcə Xocalı faciəsi qurbanlarının xatirəsi bir dəqiqəlik sükutla yad edilmişdir.
Sonra Ədliyyə Akademiyasının prorektoru, hüquq üzrə fəlsəfə doktoru İlham Abbasov Xocalı faciəsi ilə bağlı ətraflı məlumat vermişdir. Bildirilmişdir ki, 1992-ci il fevralın 26-da erməni silahlı birləşmələri keçmiş sovet ordusunun 366-cı motoatıcı alayının köməyi ilə Xocalıda misli görünməmiş, insanlığa silinməz ləkə olan soyqırımı aktı törətmiş, cəmi bir neçə saat ərzində 613 nəfər dinc azərbaycanlını qəddarcasına, dözülməz işgəncə ilə öldürmüş, 487 nəfərə ağır xəsarət yetirmiş, 1275 sakini isə girov götürmüşlər. Əsir və girov götürülmüş vətəndaşlar ağlasığmaz zülmə, təhqirlərə və həqarətə məruz qalmışlar.
Digər çıxış edənlər XX əsrin sonlarında, işğalçı Ermənistanın Azərbaycanın ərazi bütövlüyünə qəsd etməsindən, azərbaycanlılara qarşı həyata keçirdiyi etnik təmizləmə siyasətindən danışmış, Xocalı soyqırımının dünya ictimaiyyətinə çatdırılmasının vacibliyini vurğulamış, bəzi dövlətlərin azərbaycanlıların başına gətirilmiş bu və digər faciələrə biganə yanaşmalarını təəssüf hissi ilə qeyd etmişlər.
Tədbirdə xüsusi vurğulanmışdır ki, ümummilli lider Heydər Əliyevin hakimiyyətə qayıdışından sonra Xocalı faciəsinə siyasi-hüquqi qiymət verilmişdir. Məhz ulu öndərin səyi nəticəsində Milli Məclis 1994-cü il fevralın 24-də keçirilmiş iclasında “Xocalı soyqırımı (genosidi) günü” haqqında qərar qəbul edilmişdir.
Bildirilmişdir ki, ümummilli lider Heydər Əliyevin siyasi kursunun layiqli davamçısı Prezident İlham Əliyevin apardığı məqsədyönlü fəaliyyət nəticəsində işğal olunmuş torpaqlarımız beynəlxalq hüququn norma və prinsipləri əsasında azad olunacaq, Xocalı soyqırımını törədənlər öz layiqli cəzalarını alacaqlar.
Bölmənin digər xəbərləri
