Ədliyyə Nazirliyi bələdiyyələrlə iş sahəsində əldə olunmuş nəticələrə dair onlayn brifinq keçirib
Bakı, 12 mart, AZƏRTAC
Vətəndaşların ədliyyə orqanlarına əlçatanlığının təmin olunması, əhalinin ədliyyə fəaliyyəti barədə məlumatlandırılması məqsədilə vətəndaş cəmiyyəti nümayəndələrinin, KİV-lərin, eləcə də Ədliyyə Nazirliyinin rəsmi saytlarının və sosial şəbəkələrdəki səhifələrinin imkanlarından geniş istifadə olunur. Bu baxımdan xüsusi karantin rejimi dövründə nazirliyin rəsmi “Facebook” səhifəsində ədliyyənin ayrı-ayrı fəaliyyət istiqamətləri üzrə canlı yayımların keçirilməsi də əhalinin hüquqi maarifləndirilməsi işində mühüm rol oynayır.
AZƏRTAC xəbər verir ki, bu istiqamətdə həyata keçirilən tədbirlər çərçivəsində martın 12-də Ədliyyə Nazirliyi tərəfindən “Bələdiyyələrlə iş sahəsində əldə olunmuş nəticələr, 2020-ci il üzrə illik məruzə” mövzusunda onlayn brifinq təşkil olunub.
Brifinqdə iştirak edən Ədliyyə Nazirliyinin Bələdiyyələrlə İş Mərkəzinin rəis müavini Elmin Həsənov və əməkdaşı Nailə Rəsulzadə bələdiyyə fəaliyyəti, yerli özünü idarəetmə anlayışı, dövlət idarəetmə sistemində bələdiyyələrin rolu, səlahiyyətləri barədə ətraflı məlumat veriblər. Bildirilib ki, Mərkəzin əsas fəaliyyət istiqamətləri bələdiyyələrin fəaliyyətinin təşkilinə kömək etmək, onlara metodoloji yardım göstərmək, eyni zamanda, bələdiyyələrin fəaliyyətinə inzibati nəzarəti həyata keçirmək, həmçinin qanunvericiliklə müəyyənləşdirilmiş digər istiqamətlərdir.
Məlumat verilib ki, Milli Məclisin martın 9-da keçirilən iclasında bələdiyyələrin fəaliyyətinə inzibati nəzarəti həyata keçirən orqanın illik məruzəsi dinlənilib.
Bildirilib ki, ölkəmizdə yerli özünüidarəetmə institutunun yaradılması ümummilli lider Heydər Əliyevin adı ilə bağlıdır. Özünüidarəetmə orqanlarının fəaliyyəti, dövlət idarəçiliyində vətəndaşların iştirakı Ulu Öndər tərəfindən daim demokratiyanın əsas fəaliyyət istiqamətlərindən biri kimi qiymətləndirilib. Bunun nəticəsi olaraq, Azərbaycan Respublikasının Konstitusiyasında ilk dəfə olaraq bələdiyyələrin hüquqi statusu ilə bağlı müddəalar əksini tapıb. Burada bələdiyyələrin işinin təşkili, səlahiyyətləri, qərarların qəbul edilməsi qaydası və sair məsələlər yer alıb.
Yerli özünüidarəetmə isə vətəndaşların fəaliyyətinin təşkilinin sistemidir. Bu sistem onları qanun çərçivəsində yerli əhəmiyyətli məsələləri müstəqil və sərbəst şəkildə həll etmək hüququnu, Azərbaycan Respublikasının Konstitusiyasının 144-cü maddəsinə əsasən vətəndaşların mənafeyi naminə dövlət işlərinin bir hissəsini həyata keçirməkdən ibarətdir. Bu hüququ vətəndaşlar birbaşa və öz nümayəndələri vasitəsilə həyata keçirirlər. Bələdiyyələrin əsas səlahiyyətləri sırasına yerli əhəmiyyətli ekoloji, sosial, mədəni məsələlərin həlli, bu istiqamətdə proqramların icra edilməsi daxildir.
Məlumat verilib ki, özünüidarəetmə sahəsi dövlətin diqqət mərkəzində olub. Belə ki, dövlət proqramlarında bələdiyyələrin vəzifələrinin müəyyənləşdirilməsi onun fəallığının yüksəlməsinə stimul verib. Bələdiyyələr ölkə həyatının müxtəlif sahələrində fəal iştirak edirlər, həmçinin yerli əhəmiyyətli məsələlərin həllində, problemlərin aradan qaldırılmasına səy göstərirlər.
Tədbirdə bələdiyyələrin səlahiyyətlərinin həyata keçirilməsində, onların fəaliyyətinin təkmilləşdirilməsində Ədliyyə Nazirliyinin Bələdiyyələrlə İş Mərkəzinin rolundan, bələdiyyələrin fəaliyyətinə inzibati nəzarət sahəsində reallaşdırılan tədbirlərdən, bələdiyyələrin fəaliyyətinin təşkili və onlara metodoloji yardımın göstərilməsində Mərkəzin gördüyü işlərdən, bələdiyyələrin idarə edilməsində ictimai iştirakçılığının genişləndirilməsindən, gənclərin yerli özünü idarəetmə orqanlarında iştirakından bəhs edilib.
Qeyd olunub ki, 2020-ci ildə müvafiq qanunvericiliyin təkmilləşdirilməsi istiqamətində işlər davam etdirilib. Bələdiyyələrin fəaliyyətində səmərəliliyi artırmaq üçün yerli özünüidarəetmə sahəsində bir sıra qanunvericilik aktları təhlil olunub və onlara dəyişikliklərin edilməsi ilə bağlı qanun və fərman layihələri hazırlanaraq Nazirlər Kabinetinə göndərilib. Hazırda aidiyyəti dövlət orqanlarının rəy və təklifləri nəzərə alınmaqla layihələr üzərində iş davam etdirilir. Təkliflər paketində bələdiyyə torpaqlarının ayrılması prosesinin sadələşdirilməsi, bələdiyyə torpaqlarından səmərəli istifadə olunması, yerli ödənişlərin toplanmasında yaranmış problemlərin aradan qaldırılması istiqamətində qanunvericiliyin təkmilləşdirilməsi məsələləri əksini tapıb.
Vurğulanıb ki, Ədliyyə Nazirliyinin verdiyi təklif və ya iddiaların təmini nəticəsində 8,217 hektar torpaq sahəsinin bələdiyyə mülkiyyətinə və ya sahibliyinə qaytarılması təmin edilib. Azərbaycan Respublikası İnzibati Xətalar Məcəlləsinin 549-cu maddəsinə əsasən, məhkəmələrə göndərilmiş inzibati xəta haqqında protokollar üzrə 138 bələdiyyə sədri inzibati məsuliyyətə cəlb edilib. İnzibati nəzarət icraatı qaydasında aparılmış araşdırmalar zamanı 23 halda ciddi qanun pozuntuları aşkarlanaraq toplanmış sənədlər hüquqi qiymət verilməsi üçün aidiyyəti üzrə istintaq orqanlarına göndərilib. Həmin materiallardan 10-u üzrə cinayət işi başlanıb.
Dövlətimizin başçısının 2020-ci il 27 fevral tarixli Sərəncamı ilə təsdiq edilmiş “Açıq hökumətin təşviqinə dair 2020-2022-ci illər üçün Milli Fəaliyyət Planı”nda nəzərdə tutulmuş tapşırıqların icrası istiqamətində görülmüş tədbirlər nəticəsində hazırda kompüter avadanlığı ilə təmin olunub və internetə çıxışı olan bələdiyyələrin sayı artıb. 2020-ci ilin avqustundan “Bələdiyyələrlə iş portalı”nın ilkin versiyası istifadəyə verilib, nazirliyin aidiyyəti qurumları və bələdiyyələr arasında elektron sənəd mübadiləsi təşkil olunub. Bələdiyyələr barədə məlumatın əldə edilməsinə dair elektron xidmətin təşkili üzrə işlər yekunlaşdırılıb. Ötən il ümumilikdə 86 maarifləndirmə tədbiri həyata keçirilib. Bu tədbirlərdə 2315 nəfər bələdiyyə üzvü və qulluqçusu iştirak edib. İl ərzində 29 metodik vəsait hazırlanaraq bələdiyyələrə çatdırılıb.
Onlayn tədbirdə, həmçinin sosial şəbəkə istifadəçilərinin sualları cavablandırılıb.
Bölmənin digər xəbərləri
