Əfqanıstanda silahlılar güc strukturlarının yeddi əməkdaşını öldürüb
Bakı, 13 iyul, AZƏRTAC
Əfqanıstanda “Taliban” hərəkatının hücumu nəticəsində güc strukturlarının azı yeddi əməkdaşı həlak olub, iki əsgər isə yaralanıb.
AZƏRTAC 1TV News telekanalına istinadla xəbər verir ki, hadisə Əfqanıstanın Bədəxşan əyalətində baş verib. Yerli hakimiyyət orqanlarının məlumatına görə, nəzarət-buraxılış məntəqəsinə hücum edən silahlılardan beşi öldürülüb.
İnsident “Taliban” silahlılarının Qunduz əyalətində altı polis əməkdaşının həlak olması ilə nəticələnən hücumu ilə üst-üstə düşüb.
Qeyd edək ki, Əfqanıstanda sülh prosesinin başlamasına baxmayaraq, “Taliban” hərəkatı ilə hökumət qüvvələri arasında qarşıdurma davam edir. Fevral ayının sonlarında Qətərdə ABŞ və “Taliban” hərəkatı 18 ildən çox davam edən müharibə ərzində ilk sülh sazişi imzalayıb. Sülh sazişi 14 ay ərzində xarici qüvvələrin ölkədən çıxarılmasını və tərəflər arasında dialoqun başlamasını nəzərdə tutur.
Bölmənin digər xəbərləri
