EKOLOGİYA ÜZRƏ MÜTƏXƏSSİSLƏR ÜÇÜN SEMİNAR TƏŞKİL OLUNMUŞDUR
Bakı, 6 may (AZƏRTAC). Azərbaycan Respublikası Dövlət Neft Şirkəti (ARDNŞ) Sosial İnkişaf İdarəsinin Təlim, tədris və sertifikatlaşdırma Departamenti şirkətin Ekologiya İdarəsi ilə birlikdə “Ekologiya ilində ekoloji maarifləndirmənin rolu” mövzusunda seminar keçirmişdir.
ARDNŞ-in mətbuat xidmətindən bildirmişlər ki, tədbirdə departamentin direktoru Asif Bəkirli 2010-cu il üçün ekoloji maarifləndirmə ilə bağlı planlaşdırılmış tədbirlər haqqında geniş məlumat vermişdir. Bildirmişdir ki, departamentdə “ARDNŞ-in ekoloji siyasəti”nə həsr olunmuş maarifləndirmə kursları təşkil olunur. Kursların məqsədi bu aktual problemlə bağlı ictimaiyyət, o cümlədən mütəxəssislər arasında maarifləndirmə işləri aparmaqdır. Cari tədris ilində 151 nəfər ARDNŞ işçisi bu kursa cəlb olunmuşdur.
Ekologiya İdarəsinin rəisi Azər Əliyev ekologiya sahəsində cəmiyyətin üzləşdiyi qlobal problemlər barədə danışmış, şirkətin həyata keçirdiyi ekoloji layihələr barədə iştirakçıları məlumatlandırmışdır. Bakı Şəhər Ekologiya və Təbii Sərvətlər Departamenti rəisinin müavini Elnur Xəlilov, Xəzər Kompleks Ekoloji Monitorinq İdarəsinin rəisi Mirsalam Qənbərov, “Ekol Mühəndislik Xidmətləri” QSC-nin səyyar monitorinq xidmətinin rəisi Maqsud Babayev ekoloji maarifləndirmənin əhəmiyyəti ilə bağlı fikirlərini tədbir iştirakçıları ilə bölüşmüşlər.
Sonda iştirakçılar ARDNŞ-in Sosial İnkişaf İdarəsinin tabeliyində olan uşaq bağçalarında tərbiyə alan körpələrin əl işlərindən ibarət “Ekologiya uşaqların gözü ilə” mövzusunda sərgiyə tamaşa etmişlər.
Bölmənin digər xəbərləri
