Ekologiya və Təbii Sərvətlər Nazirliyinə daxil olmuş şikayət yerində araşdırılmışdır
Bakı, 29 yanvar (AZƏRTAC). Yasamal rayonu Zərdabi küçəsi 89 ünvanında ağacların qanunsuz kəsilməsi barədə Ekologiya və Təbii Sərvətlər Nazirliyinə (ETSN) daxil olmuş şikayət yerində araşdırılmışdır.
Nazirliyin mətbuat xidmətindən AZƏRTAC-a bildirmişlər ki, araşdırma zamanı həmin ünvanda 468 kvadratmetr torpaq sahəsində tikinti işlərinin aparılması üçün vətəndaş Ramiz Cabbarlıya Yasamal Rayon İcra Hakimiyyəti tərəfindən icazə sənədinin verildiyi müəyyən edilmişdir.
Əraziyə baxış zamanı tikinti sahəsinə düşən 20 santimetr diametrində 12 ədəd yaş köküstə sərv ağacının qanunun tələblərinə əməl olunmadan kökündən çıxarılaraq aparıldığı aşkar edilmişdir.
Faktla bağlı akt və protokol tərtib olunmuş, təqsirkar inzibati qaydada 14 min 400 manat məbləğində cərimə olunmuşdur.
Həmin ərazidə ünvanda tikinti işlərinin dayandırılması və yeni yaşıllıqların salınması ilə bağlı Yasamal Rayon İcra Hakimiyyətinə məktubla müraciət olunmuşdur.
Ərazi ETSN əməkdaşları tərəfindən nəzarətə götürülmüşdür.
Bölmənin digər xəbərləri
