Bakı, 24 dekabr, Göyçək Mahmudlu, AZƏRTAC

Əmək və Əhalinin Sosial Müdafiəsi Nazirliyinin tabeliyində Sosial Xidmətlər Agentliyinin Əlilliyi olan Şəxslərin Peşə-əmək Reabilitasiyası Mərkəzinə mediatur təşkil edilib.

AZƏRTAC xəbər verir ki, media nümayəndələri müəssisədə yaradılan şəraitlə, burada əlilliyi olan gənclərə göstərilən xidmətlərlə yaxından tanış olublar.

Əlilliyi olan Şəxslərin Peşə-əmək Reabilitasiyası Mərkəzinin direktoru Rəhilə Həsrətova mərkəzin 2013-cü ilin dekabrın 24-də Prezident İlham Əliyevin və birinci xanım Mehriban Əliyevanın iştirakı ilə açılışının olduğunu diqqətə çatdırıb. Qeyd olunub ki, mərkəz əlilliyi olan şəxslərin sosial reabilitasiyası, peşə-əmək reabilitasiyası və peşə hazırlığı üsulu ilə cəmiyyətə inteqrasiyası məqsədilə yaradılıb. Mərkəzdə 15-29 yaşlı əlilliyi olan şəxslərin müxtəlif peşələr üzrə peşə hazırlığı və peşə reabilitasiyasının həyata keçirildiyi, onların 3-6 aylıq kurslarda kompüter istifadəçisi, montaj operatoru, bədii oyma, xalçaçılıq, dərzilik, kişi və qadın bərbəri, toxuculuq, aşpaz köməkçisi, rəssamlıq, dulusçuluq və manikür üzrə peşə bacarıqlarına yiyələndikləri diqqətə çatdırılıb. Kursları uğurla bitirən şəxslərə peşə şəhadətnamələrinin verildiyi və əmək bazarına çıxışları üçün dəstək göstərildiyi vurğulanıb.

Bildirilib ki, mərkəzə qəbul olunanlar burada dövlət hesabına yataqxana, yemək, sosial-psixoloji və tibbi-sosial xidmətlərlə təmin olunurlar. Müəssisədə gənclər peşə kursları ilə yanaşı, musiqi və dizayn dərnəyi, stolüstü oyunlar, paralimpiya idman məşqlərinə də cəlb edilirlər: "Ötən dövr ərzində mərkəzdə 5 minə yaxın, son 5 il ərzində 2 min 600-ə yaxın əlilliyi olan gəncə xidmət göstərilib. Hazırda mərkəzdə 12 istiqamət üzrə peşə hazırlığı xidməti təşkil olunur. Mərkəzdə yeni peşələrin yaradılması üzərində də iş aparılır. Hazırda iki peşə - avadanlıqların təmiri və fotoqrafiya üzrə hazırlıq işləri həyata keçirilir. Yeni ildən həmin peşələr fəaliyyətə başlayacaq. Hazırda mərkəzdə 128 nəfərə xidmət göstərilir. Gənclərin asudə vaxtlarının təşkili məqsədilə gəzinti və ekskursiyalar təşkil olunur. Bununla yanaşı, dövlətçilik, milli adət-ənənələrimiz barədə maarifləndirmə işləri də aparılır”.

Sosial Xidmətlər Agentliyinin İctimaiyyətlə əlaqələr və kommunikasiya departamentinin müdir müavini Sərvər Abdullayev agentlik tərəfindən həssas əhali qruplarından olan vətəndaşlara, xüsusi qayğıya ehtiyacı olan şəxslərə müxtəlif sosial xidmətlərin göstərildiyini, həmin sosial xidmətlərin səyyar, stasionar və yarımstasionar formada həyata keçirildiyini bildirib. Qeyd olunub ki, stasionar formada həyata keçirilən xidmətlər müəssisələr vasitəsilə icra olunur. Həmin müəssisələrin sayı ölkə üzrə ümumilikdə 21-dir. Bu ilin ötən dövründə ümumilikdə 3 min 200-dən çox həssas kateqoriyadan olan vətəndaşlara müxtəlif sosial xidmətlər göstərilib. Əlilliyi olan Şəxslərin Peşə-əmək Reabilitasiyası Mərkəzində isə il ərzində 450-ə yaxın vətəndaşa həm peşə, həm də sosial reabilitasiyayönümlü xidmətlər göstərilir. Onlardan 369 nəfəri peşə hazırlığı kurslarına, 76-sı sosial reabilitasiya cəlb edilib: “Həmin xidmətlərin əsas məqsədi həssas əhali qruplarından olan vətəndaşların cəmiyyətə inteqrasiyası və sosial reabilitasiyasına dəstək göstərməkdir”.

Agentlik tərəfindən mütəmadi olaraq mərkəzin yetirmələrinin əl işlərindən ibarət satış sərgilərinin təşkil olunduğu da media nümayəndələrinin diqqətinə çatdırılıb. Bildirilib ki, həmin tədbirlərin məqsədi əlilliyi olan gənclərin yaradıcılıq bacarıqlarını geniş ictimaiyyətə tanıtmaq, eləcə də iqtisadi müstəqillik və özünəinamlarını gücləndirməkdir.

İyirmi bir yaşlı Leyla Buraqova üç aydır ki, mərkəzin xidmətlərindən yararlanır. O, toxuculuq, dərzilik və xalçaçılıqla maraqlandığını, gələcək karyerasını qurmaq üçün incəlikləri öyrənmək istədiyini deyib: "Burada, həmçinin özümə dostlar qazanıram, ünsiyyət qururam. Mərkəz mənə çox yaxşı təsir edir. Mən belə bir yerin mövcudluğunu sosial şəbəkələrdən öyrənmişdim. Məlumat topladım və bura müraciət etdim. Burada müəllimələrlə, yeni dostlarla tanış oldum. Müəllimlərimiz bizim üçün böyük zəhmət çəkirlər. Öyrənmək istədiyim çox şey var. Kuklalar toxumağa başlamışam. Daha müasir əl işləri öyrənmək istəyirəm. Direktorumuza gözəl bir əl işi hədiyyə etmək istəyirəm. O, mənim üçün çox dəyərlidir. Bizə əsl ana qayğısı, sevgisi göstərir".

İki aydır mərkəzdə peşə bacarıqlarına yiyələnən iyirmi altı yaşlı Kamran Atababayev uşaqlıqdan əl işlərinə marağı olduğunu və ilk dəfə xalça toxuduğunu deyib: "Xalça toxumağa başlamağa qərar verə bilmirdim və ilk dərsdən sonra bu işə başlayacağıma dair qərara gəldim. İlk əl işimi müəlliməmə hədiyyə edəcəyəm. Bundan başqa, musiqi sahəsi, ağac üzrə oymaya da böyük marağım var".

Mərkəzdə gənclərə ağac üzrə oyma sənətinin incəliklərini öyrədən Azər Əsədov 2014-c ildən burada işlədiyini və fiziki məhdudiyyətlərin həvəsi, bacarığı olan kimsəyə həmin sahəni öyrənməyə əngəl olmadığını bildirib: "Çətin peşə deyil. Buraya müraciət edən gənclərin bacarığına uyğun material seçirik. Bir əsərin ərsəyə gəlməsi şəxsin bacarığından asılıdır. Yəni qısa müddətdə də, uzun zaman ərzində də işi təhvil verə bilər. Sonra burada xidmət alanların əl işləri qiymətləndirilir. Tam bacarıqlıları ABAD-a, bir çoxları sərgilərə yönləndiririk. Mərkəzin yetirmələrindən evdə əl işləri hazırlayıb gəlir əldə edənlər də var. Nisbətən zəif götürmə qabiliyyəti olanlar ikinci dəfə müraciət edir və biz onlara yenidən şərait yaradırıq. Qavrama qabiliyyətindən asılı olaraq sənətin sirlərini minimum öyrənmə periodu 6 aydır. Masa suvenirləri 2-3 günə hazır olur. Böyük işləri imtahan üçün hazırlayırlar və bir az uzun zaman alır".

Ağstafa rayonundan gələn iyirmi yaşlı Məhəmmədli Zeynalov mərkəzdə bədii oyma peşəsini öyrənir. O, hazırda Qobustan qayalarının nümunəsini hazırlayır. "Altı ay mərkəzdə peşə hazırlığı kursundan keçmişəm. Artıq ikinci dəfədir burada kurslara qoşuluram. Daha yeni bir sahələr öyrənmək istəyirəm. Evdə də məşğul olur, əl işlərimi sərgilərdə nümayiş etdirirəm".

On səkkiz yaşlı Fərrux Qayıbovun isə milli musiqi alətlərini hazırlamağa üstünlük verir. O, deyir ki, burada hər xırdalığı öyrənmək və əl işlərini doğmalarına hədiyyə etmək, o cümlədən sifarişlər hazırlamaq istəyir".

Sonda media nümayəndələrinə mərkəzdə xidmət alan vətəndaşların əl işlərindən ibarət hədiyyələr təqdim olunub.