Elman Nəsirov: Humanizm Azərbaycanın dövlət siyasətinin təməl prinsipidir
Bakı, 8 aprel, Səadət Hakıyeva, AZƏRTAC
Prezident İlham Əliyev aprel ayının 6-da məhkum olunan bir sıra şəxslərin əfv olunması haqqında Sərəncam imzaladı. Sərəncamın əhatə dairəsinə koronavirus infeksiyasının yayılması ilə əlaqədar yaşına və səhhətinə görə xüsusi qayğıya ehtiyacı olan yaşı 65-dən yuxarı məhkumlar daxil edilib. Bu kateqoriyadan olan 176 nəfər məhbus cəzasının çəkilməmiş hissəsindən azad olunub. Azərbaycan dövləti və onun rəhbəri bu addımı atmaqla idarəetmədə şəfqət, humanizm və insanpərvərlik kimi ali dəyərlərə sadiq qaldığını növbəti dəfə nümayiş etdirdi. Bu da təsadüfi deyil. Dövlətimizin başçısı ümummilli lider Heydər Əliyevin müəyyən etdiyi siyasi kursa sadiqdir və onu yeni dünya reallıqlarına adekvat olaraq davam etdirir.
Bu sözləri AZƏRTAC-a açıqlamasında Milli Məclisinin deputatı, YAP Beynəlxalq əlaqələr komissiyasının katibi, siyasi elmlər doktoru, professor Elman Nəsirov söyləyib.
Elman Nəsirov vurğulayıb ki, Azərbaycanda humanizmi baza prinsipi olaraq siyasətə gətirməklə əfv və amnistiya təsisatlarının yaradılması məhz ulu öndər Heydər Əliyevin adı ilə bağlıdır. Məhz onun təşəbbüsü və iradəsi sayəsində 1995-2003-cü illərdə 77 mindən çox məhkuma şamil edilən 7 amnistiya aktı və 32 əfv fərmanı verilib. Bu məhkumlardan 21 min 325 nəfərinin cəzasının çəkilməmiş hissəsindən azad olunduğunu bildirən deputat deyib: “Prezident İlham Əliyevin imzaladığı əfv sərəncamlarına əsasən isə 4871 nəfər məhkum azad olunub. Azərbaycanda və onun hüdudlarından kənarda belə şəfqət, mərhəmət, nəciblik mücəssəməsinə çevrilmiş Birinci vitse-prezident, UNESCO və ISESCO-nun xoşməramlı səfiri Mehriban Əliyeva hələ Milli Məclisin deputatı olarkən 4 dəfə - 2007, 2009, 2013 və 2016-cı illərdə amnistiya aktının qəbulu ilə bağlı qanunvericilik təşəbbüsləri ilə çıxış edib, nəticədə 40 mindən artıq məhkumun cəzası tam və ya qismən ləğv olunub. Sadalanan bütün bu faktlar və arqumentlər bir daha təsdiqləyir ki, insanpərvərlik və humanizm prinsipləri son 27 il ərzində Azərbaycanın dövlət siyasətinin təməl prinsipləri olaraq tətbiq və təşviq olunmaqdadır. Azərbaycan Prezidentinin 6 aprel tarixli əfv Sərəncamı da eyni məntiqin yeni şəraitdə ifadəsi kimi qiymətləndirilməlidir”.
Siyasi elmlər doktoru bu cür humanizm prinsipləri fonunda radikal müxalifətin yenə öz naqis, xain xislətini büruzə verməsindən təəssüfləndiyini bildirib. Qeyd edib ki, Azərbaycan hakimiyyətinin koronavirus infeksiyasına qarşı mübarizədə həmrəylik, birlik və məsuliyyətimizi daha da möhkəmləndirmək ilə bağlı çağırışları, eyni zamanda, xalqımızı və dövlətimizi bu qorxunc xəstəliyin acı nəticələrindən hifz etmək üçün gördüyü sərt karantin tədbirləri “beşinci kolon”un nümayəndələri tərəfindən yaxşı qarşılanmamış, onlar növbəti dəfə öz məkrli məqsədləri daxilində qarayaxma, yalan və iftira kampaniyasını həyata keçirməyə cəhd edirlər. Onların paralel olaraq ianələrini aldıqları müəyyən xarici dövlətlərin eyni infeksiyaya qarşı eyni qəbildən olan addımlarının şərəfinə mədhiyyələr qoşmaq növbəsinə dayanıqları da diqqətdən yayınmır. Bu ikiüzlülük və milli xəyanətin klassik nümunəsi kimi göz qabağındadır. “Hətta iş o yerə çatıb ki, bu antimilli ünsürlər işğalçı Ermənistanın koronavirusa qarşı atdığı müəyyən addımları təqdir etməkdən belə çəkinmir, guya ki, rəsmi Yerevanın məcburi məhdudiyyətlərə rəvac verən addımları ölkədə “demokratiyanın baza prinsiplərini zədələmir” kimi gülünc və sərsəm ifadələr işətməkdən belə çəkinmirlər. Halbuki, “sapı özümüzdən olan baltalar” çox gözəl bilirlər ki, işğalçı Ermənistanda martın 16-da fövqəladə vəziyyət elan edilib, mətbuata senzura tətbiq olunub. Kütləvi informasiya vasitələri və sosial şəbəkələrin koronavirus pandemiyası ilə bağlı yalnız rəsmi məlumatlara istinad etmələri bir qanun tələbi kimi irəli sürülüb. Bunun əksi olduqda, müvafiq addımı atmış tərəf iki saat ərzində mətbuatda təkzib verməlidir. Əks təqdirdə, qaydanı pozan şəxs fövqəladə vəziyyət rejiminin sərt qanunları ilə cəzalandırılır”, - deyə professor diqqətə çatdırıb.
Elman Nəsirov onu da bildirib ki, radikal dəstə və qruplaşmalar öz naqis xislətlərinə adekvat olaraq “koronavirus demokratiyası” deyilən həqarətli bir termin də icad ediblər. Xalqımız onları “şanlı” keçmişlərinə görə “azadlıq aşiqləri” kimi xatırlayır və rədd edir. Bundan sonra isə onları “koronavirus demokratları” kimi daimi “siyasi izolyasiya”da saxlayacaqları artıq teorem yox, aksioma tələbidir.
Bölmənin digər xəbərləri
