Əlyazmalar İnstitutunda Xocalı faciəsinin qurbanları yad edilmişdir
Bakı, 22 fevral (AZƏRTAC). Fevralın 22-də AMEA Məhəmməd Füzuli adına Əlyazmalar İnstitutunda Xocalı faciəsinin 21-ci ildönümünə həsr edilmiş sessiya keçirilmişdir.
Əlyazmalar İnstitutundan AZƏRTAC-a bildirmişlər ki, iclasda direktor əvəzi, filologiya elmləri doktoru Paşa Kərimov Xocalı faciəsinin çağdaş tariximizdə unudulması mümkün olmayan, xalqın şüuruna dərin iz salaraq onu mübarizəyə səsləyən hadisə adlandırmış, institutda saxlanan Qarabağ tarixinə, ədəbiyyata dair əsərlərdən danışmışdır. Bildirmişdir ki, hazırda institutda Qarabağa dair əsərlərin tədqiqi və nəşri intensiv surətdə davam etməkdədir.
Çıxış edənlərdən filologiya elmləri doktoru Kamandar Şərifli, filologiya üzrə fəlsəfə doktorları Əli Əliyev, Raqub Kərimov və başqaları Xocalı faciəsi qurbanlarının heç bir zaman unudulmayacağını söyləmiş, işğal olunmuş torpaqlarımızın mütləq qaytarılacağına əmin olduqlarını bildirmişlər.
Bölmənin digər xəbərləri
