ƏMƏK MÜNASİBƏTLƏRİ SAHƏSİNDƏ İŞƏGÖTÜRƏNLƏRİN VƏZİFƏLƏRİ MÜZAKİRƏ OLUNMUŞDUR

02.11.2004 [23:49]
Çap et
A⁺ A^-

Əmək və Əhalinin Sosial Müdafiəsi Nazirliyi və Azərbaycan Respublikası Sahibkarlar (İşəgötürənlər) Təşkilatları Milli Konfederasiyası tərəfindən təsdiq olunmuş proqrama əsasən “Əmək münasibətləri sahəsində işəgötürənlərin vəzifələri və tərəflərin əmək qanunvericiliyinin pozulmasına görə məsuliyyət məsələsi” mövzusunda növbəti seminar Zaqatala şəhərində keçirilmişdir.

Konfederasiyadan AZƏRTAC-a bildirmişlər ki, məşğələdə 60-dan çox iş adamı, o cümlədən sahibkarlıq subyektlərinin rəhbərləri, əmək münasibətləri sahəsində işəgötürənlərin səlahiyyətlərini yerinə yetirən şəxslər iştirak etmişlər.

Tədbirdə “Əməyin mühafizəsi üzrə dövlət siyasəti və işəgötürənlərin bu sahədə vəzifələri”, “Əmək müqaviləsinin şərtlərinin tərtib edilməsi qaydaları və onların yerinə yetirilməsində tərəflərin qarşılıqlı məsuliyyəti” və “ Əmək münasibətlərinin tənzimlənməsində işəgötürənlərin rolu” mövzularına həsr olunmuş məruzələr dinlənilmişdir.

Qeyd edək ki, növbəti seminarların Əli Bayramlı və Lənkəran şəhərlərində keçiriləcəyi nəzərdə tutulur.