Emil Nağızadə: Könüllülük yeni üfüqlər kəşf etmək imkanıdır
Bakı, 20 avqust, Günel Alıyeva, AZƏRTAC
AZƏRTAC Azərbaycanın könüllülər ilə müsahibələr silsiləsini davam etdirir. Növbəti həmsöhbətimiz Bakı Dövlət Universitetinin jurnalistika fakültəsinin 2-ci kurs tələbəsi, bu fakültənin Həmkarlar ittifaqı komitəsinin sədr müavini Emil Nağızadədir.
- Emil, könüllülük fəaliyyəti ilə nə vaxtdan məşğul olursunuz?
- Mən birinci kursdan könüllülük fəaliyyəti ilə məşğulam. Ətrafımda artıq könüllülük hərəkatında fəal iştirak edən insanlar var idi və onların dəstəyi sayəsində bu işə daha da həvəsləndim. Hazırda Bakı Dövlət Universiteti jurnalistika fakültəsinin Həmkarlar ittifaqı komitəsinin sədr müaviniyəm.
- Sizi könüllü olmağa ruhlandıran nə oldu?
- Könüllülük maraqlı və mənalı tədbirlərdə iştirak etmək, həmçinin yeni üfüqlər kəşf etmək imkanıdır. Bu fəaliyyət peşəkar həyatda lazım ola biləcək bir çox faydalı bacarıq və təcrübə verir. Bundan əlavə, könüllülük sosial planda da inkişaf etməyə kömək edir. Sosial çevrə artır, yeni tanışlıqlar yaranır, daha fəal olursan, cəmiyyətə faydalı olmağa çalışırsan. Könüllülük həm də gələcəkdə, xüsusən də karyerada mühüm rol oynayır. Saydığım bütün amilləri nəzərə alaraq, bu fəaliyyətə həvəsim artdı.
- Nə kimi layihələr və tədbirlər təşkil edirsiniz?
- Komanda ilə tələbələr üçün onların ictimai fəallığına töhfə verən müxtəlif tədbirlər təşkil edirik. Mədəni-maarif tədbirləri keçiririk, gəncləri teatrlara, konsertlərə ödənişsiz göndəririk. Bu yaxınlarda bir neçə teatr tamaşalarında və konsertlərdə olduq. Universitetdə tələbələr arasında ictimai fəallığın yaradılmasına yönəlmiş layihələrimiz də var. Bu layihələrdən biri də “Aprel şəfəqi. İlk Qələbə” adlı quruluşdur, onun ssenari müəlliflərindən biri də mənəm.
Biz müxtəlif xarici təşkilatlarla da əməkdaşlıq edirik. Məsələn, “Park Cinema” və “CinemaPlus” ilə əməkdaşlığımız sayəsində biz tez-tez tələbələr üçün kino seansları təşkil edirik. 2023-cü ildə bir qrup tələbə ilə birlikdə “Xəyanətə yox” filminin premyerasında olduq.
Universitet daxilində tələbələrin xüsusilə fəal olduğu ekoloji təmizliyə həsr olunmuş tədbirləri fəal şəkildə keçiririk. Məsələn, 2023-cü ildə Bakı Dövlət Universitetinin həyətində və paytaxtdakı bəzi digər yerlərdə ağaclar əkmişik. Bundan əlavə, tələbələrlə birlikdə bir layihə təşkil etdik, onun çərçivəsində evsiz heyvanlar üçün yem alırdıq.
- Ən yaddaqalan uğurlarınız hansılardır?
- Ən yaddaqalan uğurlardan biri ətraf mühitin mühafizəsi ilə bağlı tədbirlər oldu. Tələbələrin böyük marağını, fəal iştirakını və ətraf mühitin mühafizəsinə töhfə vermək istəyini müşahidə etdik.
- Könüllülük fəaliyyətində hansı çətinliklərlə qarşılaşırsınız?
- İlk növbədə, könüllülük böyük məsuliyyət tələb edir. Buna qeyri-ciddi yanaşmaq yolverilməzdir. Hər bir tələbə unikaldır və onlara fərdi yanaşma üsulu tapmaq lazımdır. Bəzən bu, olduqca çətin olur, çünki çoxlu əmək, səbir və insanlarla işləmək bacarığı tələb edir.
- Sizə hansı resurslar və dəstək verilir?
- Tələbə Həmkarlar ittifaqı komitəsi bizə maddi və mənəvi dəstək göstərir. Bundan əlavə, Fakültə həmkarlar ittifaqı çərçivəsində komandamız da böyük dəstək verir ki, bu da çətinliklərin öhdəsindən gəlməyə kömək edir.
- Gələcək planlarınız haqqında nə deyə bilərsiniz?
- Gələcəkdə tələbələri elmi tədbirlərdə iştiraka cəlb etməyi planlaşdırıram, çünki dəstək olmaq istədiyim çoxlu sayda istedadlı və ağıllı tələbələrimiz var.
Bununla yanaşı, ətraf mühit mənim üçün çox vacib olduğundan, ekoloji tədbirlərin sayını artırmaq niyyətindəyəm. Daha bir məqsədim ssenarisini yazmaq istədiyim daha çox tədbir keçirməkdir.
Bölmənin digər xəbərləri
