Əmmanda Azərbaycan-İordaniya Dostluq Cəmiyyətinin beşinci ildönümü qeyd edilib
Əmman, 25 sentyabr (AZƏRTAC). Əmman şəhərində Azərbaycan-İordaniya Dostluq Cəmiyyətinin yaradılmasının beşinci ildönümü münasibətilə tədbir keçirilib. Azərbaycanın İordaniyadakı səfirliyinin təşəbbüsü ilə keçirilən tədbirdə Cəmiyyətin idarə heyətinin, İordaniya Senatının üzvləri, Əmmanda akkreditə olunmuş diplomatik korpusun nümayəndələri, Azərbaycan diasporunun təmsilçiləri, səfirliyin əməkdaşları, tələbələr iştirak ediblər.
Hər iki ölkənin dövlət himnləri səsləndirildikdən sonra səfir Sabir Ağabəyov çıxış edərək Azərbaycan ilə İordaniya arasında qardaşlıq münasibətlərinin tarixindən, ötən müddətdə Dostluq Cəmiyyətinin əlaqələrimizin inkişafına verdiyi töhfələrdən, qurumun gələcək planlarından danışıb. O, həmçinin Azərbaycanın İordaniyadakı keçmiş səfiri mərhum Elman Araslının Cəmiyyətin yaradılmasında rolunu vurğulayıb.
Cəmiyyətin İordaniya tərəfdən həmsədri Marvan Al-Humud qurumun ölkələrimiz arasında ikitərəfli münasibətlərin inkişafı istiqamətində gördüyü işlərdən danışıb. O, Cəmiyyət tərəfindən İordaniyada Azərbaycanla bağlı təbliğat işlərinin daha fəal şəkildə aparılacağını bildirib. Marvan Al-Humud qurumun işinə daim dəstək verdiyinə görə səfirliyə minnətdarlığını bildirib.
Tədbirin sonunda ziyafət təşkil edilib.
Asya Hacızadə
AZƏRTAC-ın xüsusi müxbiri
Əmman
Bölmənin digər xəbərləri
