ƏRDOĞAN KİPR TÜRKLƏRİNİN LİDERİNİ KİPR MƏSƏLƏSİNƏ DAİR DANIŞIQLAR PROSESİNİ BOYKOT ETMƏMƏYƏ ÇAĞIRIR

22.03.2004 [18:04]
Çap et
A⁺ A^-

AZƏRTAC-ın Ankaradan aldığı xəbərə görə, Türkiyənin Baş naziri Rəcəb Tayyib Ərdoğan Kipr türklərinin lideri Rauf Denktaşı Kipr məsələsinə dair danışıqlar prosesini boykot etməməyə çağırmışdır. Ərdoğan demişdir: “Biz bölünmüş adanın problemi haqqında qərar çıxarılmasında iştirakdan imtina etməməliyik və buna haqqımız yoxdur”.

Məsələ burasındadır ki, Kipr türklərinin lideri Rauf Denktaşın bəyanatına görə, yunan tərəfi güzəştli və çevik mövqe tutmadığına görə danışıqlarda iştirak etməyəcəkdir.

BMT-nin təşəbbüsü ilə aparılan danışıqlardan məqsəd birləşdirilmiş ikiicmalı və ikizonalı dövlət yaradılması yolu ilə adanın probleminin hərtərəfli nizama salınması haqqında martın 26-dək saziş imzalamaqdır. Bu problemə dair razılaşma əldə edilərsə, Türkiyənin Avropa Birliyinə doğru yolunda “yaşıl işıq” yandırılacaq, birləşmiş Kipr isə mayın 1-də onun tamhüquqlu üzvü olacaqdır.

Danışıqların yekun mərhələsi martın 22-də İsveçrədə keçirilməlidir.