Ermənistan qadınların məişət zorakılığına ən çox məruz qaldıqları ölkələrdən biridir
Paris, 2 avqust (AZƏRTAC). Parisdə nəşr olunan gündəlik “Ermənistan xəbərləri” jurnalı 1 avqust tarixli nömrəsində Ermənistanda qadınların məişət zorakılığına məruz qalmasından və bunu doğuran səbəblərdən bəhs etmişdir.
Jurnal yazır ki, son illər Ermənistanda qadınlara qarşı zorakılıq hallarının sayı durmadan artır. Erməni ailələrində söz-söhbətin yaranmasının və sonda faciə ilə nəticələnməsinin əsas səbəbi bir tərəfdən iqtisadiyyatı iflic vəziyyətinə düşən ölkədə əhalinin əksəriyyətinin yoxsulluğun son həddində yaşamasıdırsa, digər tərəfdən işsizliyin tüğyan etməsidir. Məhz bu səbəblər ucbatından ailə başçısının ailəni lazımi səviyyədə dolandıra bilməməsi, yarıac-yarıtox saxlaması məişətdə zorakılıq hallarının doğuran amillər sırasındadır. Sosial vəziyyəti ağır olan ailədə söz-söhbətin yaranması son nəticədə qadına əri tərəfindən divan tutulmasına gətirib çıxarır.
Erməni Qadınlarının Müdafiə Cəmiyyətinin məlumatına istinad edən jurnal xəbər verir ki, ötən il məişətdə zorakılıq zəminində yeddi qadın qətlə yetirilmiş, onlarla qadın ağır bədən xəsarəti almışdır. Qadın problemi ilə məşğul olan qeyri-hökumət təşkilatının sədri Anna Aruşyan etiraf etmişdir ki, 2012-ci il iyun ayının sonlarında Ermənistanda iyirmidən artıq ciddi məişət zorakılığı hadisəsi qeydə alınmışdır. Ermənistan polisi isə məişətdə zorakılığa məruz qalaraq faciəli şəkildə həyatını itirmiş qadınlarla bağlı hadisələri nə təkzib edir, nə də bu haqda məlumat verir. Hüquq mühafizə orqanları məişətdə zorakılıq zəminində baş verən hadisələrə nədənsə adi hal kimi baxır və məsələyə ciddi yanaşmırlar. Hətta Ermənistanın cinayət məcəlləsində məişətdə qadın zorakılığını müəyyən edən və buna görə cinayət məsuliyyəti nəzərdə tutan maddə belə yoxdur.
Jurnalın yazdığına görə, Amerika Birləşmiş Ştatlarının Dövlət Departamentinin dünyada insan haqları ilə bağlı illik hesabatının Ermənistana dair hissəsində ötən il ölkədə 762 məişət zorakılığı hadisəsinin qeydə alındığı bildirilir. Onların 455-i ər-arvad arasında baş verən söz-söhbət zamanı qadınların ağır bədən xəsarəti alması və ya ərləri tərəfindən qətlə yetirilməsi ilə nəticələnmişdir. Dövlət departamentinin hesabatında, həmçinin qeyd olunur ki, Ermənistan qanunvericiliyində məişətdə zorakılığa görə cəza nəzərdə tutulmaması bu hallarının artmasına şərait yaradan amillərdən biridir.
Yuxarıdakı faktlar məişət zorakılıqlarının tam olmayan statistikasıdır. Belə ki, ailədə baş verən zorakılıq hallarının bir çoxu ərindən qorxan qadınlar tərəfindən gizlədilir. Bəzən isə zorakılığa məruz qalan qadınlar ailə problemini ictimailəşdirmək istəmirlər. Bu vəziyyət ölkədə qadınlara qarşı zorakılıq hallarının sayı barədə dəqiq məlumat əldə etməyə imkan vermir.
“Ermənistan xəbərləri” qeyri-hökumət təşkilatlarının məişətdə zorakılıq hallarına qarşı mübarizə məsələsinə diqqət göstərmək haqqında müraciətlərini dövlətin qulaqardına vurduğunu, hətta bununla bağlı hazırlanan qanun layihəsinin müzakirəsindən belə boyun qaçırdığını qeyd edərək belə nəticəyə gəlir ki, Ermənistan rəsmilərinin ciddi məsələyə bu cür soyuq münasibəti onların ölkədə yaranmış problemləri həll etməkdə aciz olduqlarının daha bir sübutudur. Digər tərəfdən, korrupsiyaya qurşanan məmurlar məsələyə ona görə diqqət ayırmırlar ki, bundan pul çıxmır. Yəni qazanc olmayan yerdə, maraq da yoxdur.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
