“Əş-Şarq əl-Avsət” qəzetində Zəngəzur dəhlizi ilə bağlı məqalələr dərc edilib
Qahirə, 12 avqust, AZƏRTAC
Səudiyyə Ərəbistanı Krallığının Londonda nəşr olunan nüfuzlu “əş-Şarq əl-Avsət” qəzetində Azərbaycan-Ermənistan razılaşmasına həsr edilən məqalələr dərc edilib.
AZƏRTAC xəbər verir ki, Zəngəzur dəhlizindən (Tramp yolu) və son Vaşinqton razılaşmasından bəhs edilən yazıda Türkiyənin əldə olunmuş razılaşmaya mövqeyi təhlil edilib. Qeyd olunub ki, Türkiyə ABŞ Prezidenti Donald Trampın vasitəçiliyi ilə Vaşinqtonda imzalanan Azərbaycan və Ermənistan arasındakı birgə sülh bəyanatını alqışlayıb. Ankara, bəyanatda yer alan və Azərbaycanı Ermənistan ərazisindən keçməklə Naxçıvan Muxtar Respublikası ilə birləşdirəcək "Zəngəzur dəhlizi"nə dəstəyini ifadə edib. Bu dəhliz Türkiyəyə Asiyaya birbaşa çıxış imkanı verəcək və onu Avropa ilə strateji birləşmə nöqtəsinə çevirəcək.
Yazıda Türkiyənin xarici işlər naziri Hakan Fidanın şənbə günü Misirin əl-Ələmeyn şəhərində misirli həmkarı Bədr Əbdülati ilə keçirdiyi birgə mətbuat konfransında səsləndirdiyi fikirlərə də yer verilib. "Əgər Zəngəzur dəhlizi planlandığı kimi həyata keçirilsə, bu, Avropadan Asiyanın dərinliklərinə qədər uzanan səmərəli bir nəqliyyat dəhlizinin mühüm hissəsi olacaq", - deyə nazir vurğulayıb. O əlavə edib ki, bu dəhliz yalnız Türkiyəni Qafqaz və Xəzər dənizi üzərindən Mərkəzi Asiya ilə deyil, həmçinin bütün türk dünyası ilə birləşdirəcək. Həmçinin türk dünyasını Avropa, Avropanı isə Asiyanın dərinlikləri ilə birləşdirəcək çoxtərəfli bir yol olacaq.
Qəzet yazır ki, Azərbaycan uzun müddətdir ki, Ermənistan ərazisindən keçən və Naxçıvanla birbaşa əlaqə yaradacaq bu dəhlizin həyata keçirilməsinə çalışırdı, çünki hazırda hər iki bölgə arasında birbaşa quru yolu yoxdur. Razılaşmaya əsasən, strateji və təbii ehtiyatlarla zəngin olan Zəngəzur dəhlizinin inkişaf hüquqları ABŞ-a verilib.
Türkiyə Prezidenti Rəcəb Tayyib Ərdoğan şənbə günü Azərbaycan Prezidenti İlham Əliyevlə telefon danışığında Azərbaycan və Ermənistan arasında əldə olunan sülhə yönəlik irəliləyişi alqışlayıb və bu məqsədlə Ankaranın dəstəyini davam etdirəcəyini bildirib.
Məqalədə, həmçinin bildirilir ki, Türkiyə Xarici İşlər Nazirliyi də cümə günü verdiyi bəyanatda Azərbaycan və Ermənistan arasında davamlı sülhə doğru atılan addımları alqışlayıb.
Bildirilir ki, bu ilin mart ayında Azərbaycan və Ermənistan arasında imzalanması planlaşdırılan sülh razılaşmasının mətni ilə bağlı razılıq əldə olunmuşdu. Bakı bu proses üçün İrəvandan konstitusiyasını dəyişməyi, Azərbaycanın ərazi bütövlüyünü və suverenliyini inkar edən maddələri və digər hüquqi aktları ləğv etməyi tələb edib.
Hər iki ölkə, münaqişəni həll etmək üçün yaradılmış ATƏT-in Minsk Qrupunun da ləğv olunmasını tələb ediblər.
Məqalədə türkiyəli ekspertlərin də fikirlərinə yer verilib. Qeyd olunur ki, onların fikrincə, ABŞ-ın vasitəçiliyi ilə əldə edilən razılaşmanın yalnız Cənubi Qafqazda deyil, həm də Mərkəzi Asiya və Yaxın Şərqdə siyasi və iqtisadi balansları dəyişəcək.
Şıxəli Əliyev
AZƏRTAC-ın xüsusi müxbiri
Qahirə
Bölmənin digər xəbərləri
