Əsl hünər qurmaq, tikmək, yaratmaqdır – Deputat
Bakı, 30 sentyabr, AZƏRTAC
Azərbaycanın iqtisadi-siyasi, sosial-mədəni, hərbi quruculuq sahələrində, beynəlxalq aləmdə qazandığı uğurlar onun gələcək inkişafına yollar açır və əldə olunan nəticələri daha da möhkəmləndirir. Düşmən üzərində tarixi Qələbədən, müvəffəqiyyətlə həyata keçirilən antiterror tədbirlərindən sonra Prezident İlham Əliyev bir daha özünün sülh, əmin-amanlıq, qarşılıqlı əməkdaşlıq, ölkələrin suverenliyinə və ərazi bütövlüyünə hörmət amallarını ortaya qoydu. Dövlətimizin başçısı dünyaya bəyan etdi ki, Azərbaycan qalib dövlət olmasına, uzun illər erməni təcavüzündən əziyyət çəkməsinə, dünyanın bir çox ölkələrinin ədalətsiz mövqeyi ilə qarşılaşmasına, haqqı, hüquqları boğulmasına baxmayaraq, Ermənistanla sülh şəraitində yaşamaq, düşmənçiliyə son qoyulması fikrindədir. Azərbaycan Prezidenti dəfələrlə bildirib ki, biz məhv etməyin, viran qoymağın, qan axıtmağın, insanlara zülm etməyin yox, qurub-yaratmağın, tikməyin, abadlaşdırmağın, xalqlara xoşbəxt həyat bəxş etməyin tərəfdarıyıq. Bu yol ata-babalarımızın, Ulu Öndər Heydər Əliyevin yoludur və onun faydaları Azərbaycan xalqının rifahına yönəldilib.
Bu sözləri AZƏRTAC-a açıqlamasında Milli Məclisin Aqrar siyasət komitəsinin sədri Tahir Rzayev söyləyib.
Onun sözlərinə görə, ölkənin inkişafına dair mühüm dövlət proqramlarının uğurla həyata keçirilməsi və bu gün də davam etdirilməsi Azərbaycanın iqtisadi-mədəni həyatını tamamilə dəyişib. Yol, işıq, qaz, su, nəqliyyat problemlərinin köklü surətdə aradan qaldırılması, regionda yaşayan əhalınin həyat tərzinin yaxşılaşdırılması, sosial sahələrdə mümkün layihələrin yerinə yetirilməsi insan amilinə verilən dəyərin əyani ifadəsi kimi qiymətlidir. Məhz bu amillər 44 günlük Vətən müharibəsində, eləcə də 23 saatlıq antiterror tədbirlərində xalqımızı bir yumruq kimi Prezidentimizin ətrafında sıx birləşdirdi, Ordumuza güc-qüvvət verdi, düşmən üzərində tarixi Qələbəmizi təmin etdi.
“Azərbaycan torpaqlarını azğın düşməndən azad etmək, xalqın rifahını yüksəltmək üçün əməli tədbirlər görmək, bütün qüvvələri ölkənin sosial-iqtisadi qüdrətinin yüksəldilməsinə yönəltmək, ölkəni beynəlxalq aləmdə tanıtmaq və söz sahibi etmək Prezident seçildiyi ilk gündən İlham Əliyevin həyat amalı, vəzifə borcu oldu. Dövlətimizin başçısı fəaliyyəti dövründə bu vəzifələri şərəflə yerinə yetirməkdədir. Azərbaycan Prezidenti tarixi Qələbədən sonra işğaldan azad edilən ərazilərin tez bir zamanda bərpa edilməsini qarşıya məqsəd qoyub və bu gün həmin ərazilərdə görülən möhtəşəm işlər - müasir yolların çəkilməsi, körpülərin salınması, tunellərin qazılması, beynəlxalq əhəmiyyətli təyyarə meydanlarının istifadəyə verilməsi, elektrik stansiyalarının quraşdırılması, yeni yaşayış, məktəb, səhiyyə binalarının tikilməsi, uşaq bağçalarının, mədəni-məişət obyektlərinin istifadəyə verilməsi, əhalinin Laçına, Füzuliyə, Zəngilana köçürülməsi, yeni ağıllı kənd və şəhər layihələrinin reallaşdırılması ali məqsədlərin ardıcıl həyata keçirilməsinin ifadəsidir”,- deyə deputat vurğulayıb.
T.Rzayev bildirib ki, işğaldan azad olunan əraziləri cənnətə çevirəcəyik devizi bu gün hər bir azərbaycanlının ürəyindəndir və ölkə rəhbərinin xoşməramlı çağırışları xalqımız tərəfindən yüksək dəyərləndirilir. İnsanlarımız qələbələrimizlə qürur duyduqları kimi həyata keçirilən quruculuq, abadlıq, məskunlaşma işləri ilə də fəxr edirlər. Çünki ərazilərin bərpası, həmin torpaqların yararlı hala salınıb əkin dövriyyəsinə daxil edilməsi, dağıdılmış, viran edilmış şəhər və kəndlərimizin canlandırılması iqtisadi inkişafımızın əsasıdır, dövlətimizin daha da qüdrətlənməsi deməkdir.
O deyib: “Azərbaycan Prezidentinin bu günlərdə işğaldan azad olunmuş Cəbrayıl və Zəngilan rayonlarına səfəri zamanı yeni inzibati və yaşayış binalarının, komplekslərinin, kəndlərin, uşaq bağçasının təməlinin qoyulmasında, Cəbrayıl Rəqəmsal İdarəetmə Mərkəzinin, “Cahangirbəyli” su elektrik stansiyasının açılışında iştirak etməsi, bir çox obyektlərdə görülən işlərlə tanış olması, verilən vədlərin, qarşıya qoyulan vəzifələrin uğurla yerinə yetirilməsini göstərir. Görülən işlər və nəzərdə tutulan tədbirlər, dövlət rəhbərinin müntəzəm olaraq işğaldan azad olunmuş ərazilərə səfər etməsi, yeni tapşırıqlar verməsi və işlərin gedişini daim nəzarətdə saxlaması dövlətə, torpağa, xalqa məhəbbətin, verilən vədə sədaqətin nümunəsi olmaqla bərabər, vətənin ucaldılması, xalqın bir mübariz yaradıcı, sülhsevər kimi tanıdılmasıdır. Azərbaycan xalqı cəbhədə qazandığı qələbələri bu gün tikinti meydançalarında təkrarlayır və dünyaya sübut edir ki, təcavüz, qan tökmək, ev yıxmaq hünər deyil. Alilik, insanlıq, bacarıq, hünər, sülhü qorumaq, torpağı əkib-becərmək, insanlara həyat verməkdir. Bu ali dəyərlər Azərbaycan xalqına, dövlətimizin rəhbərinə xasdır. İnsanlığa, haqq-ədalətə arxalanmaq dövlətimizi ucaldır və bundan sonra da ucaldacaq”.
Bölmənin digər xəbərləri
