“ETSN-də bir gün” ekoloji maarifləndirmə layihəsi davam edir
Bakı, 14 may, AZƏRTAC
“ETSN-də bir gün” ekoloji maarifləndirmə layihəsi çərçivəsində Ekologiya və Təbii Sərvətlər Nazirliyində Xəzər Universiteti Dünya Məktəbinin şagirdləri ilə görüş keçirilib.
Nazirliyin mətbuat xidmətindən AZƏRTAC-a verilən məlumata görə, görüş zamanı Milli Hidrometeorologiya Xidmətinin İqlim və meteoroloji tədqiqatlar mərkəzinin direktoru Aslan Şıxəliyev iqlim dəyişmələri, həmin prosesin əsas səbəblərindən olan istixana effekti yaradan qaz emissiyaları və onların ətraf mühitə təsiri barədə şagirdlərə geniş məlumat verib.
Mərkəzin mütəxəssisləri Aygün Nərimanova və Solmaz Rzayeva iqlim dəyişmələrinin nəticələri, buzlaqların əriməsi, dəniz səviyyəsinin dəyişməsi, quraqlıq, sel və digər ekstremal hava hadisələri haqqında məlumat veriblər. Eyni zamanda, problemin qarşısının alınması məqsədilə bərpaolunan enerji mənbələrindən istifadə, ağacəkmə, enerji qənaəti və ətraf mühitin qorunmasının əhəmiyyəti diqqətə çatdırılıb.
Nazirliyin Beynəlxalq əməkdaşlıq şöbəsinin sektor müdiri Aysel Rzayeva çıxış edib və şagirdlərə bu il ölkəmizin Ümumdünya Ətraf Mühit Gününə ev sahibliyi edəcəyini, tədbirin ətraf mühitin mühafizəsi, iqlim dəyişmələri ilə mübarizə və dayanıqlı inkişaf istiqamətində beynəlxalq əməkdaşlığın gücləndirilməsi baxımından xüsusi əhəmiyyət daşıdığını bildirib.
Qeyd edək ki, “Şəhərsalma və Memarlıq İli” çərçivəsində təşkil olunan maarifləndirici tədbirlər 2026-cı ildə Bakıda keçiriləcək Ümumdünya Ətraf Mühit Günü və Ümumdünya Şəhərsalma Forumunun On Üçüncü Sessiyası (WUF13) ərəfəsində ekoloji təşəbbüslərin təşviqinə və ətraf mühitin mühafizəsi sahəsində ictimai fəallığın artırılmasına xidmət edir.
Bölmənin digər xəbərləri
