“Eurovision-2012” mahnı müsabiqəsinə Şəkidə də fəal hazırlıq işləri görülür
Şəki, 28 aprel (AZƏRTAC). Bakıda keçiriləcək “Eurovision-2012” mahnı müsabiqəsi paytaxtla yanaşı, bölgələrin də turizm potensialının tanıdılması və təbliği baxımından mühüm əhəmiyyət kəsb edəcəkdir. Bu musiqi bayramına dünya əhəmiyyətli tarixi-memarlıq abidələri, əsrarəngiz təbiəti və zəngin sənətkarlıq ənənələri ilə məşhur olan qədim Şəkidə də fəal hazırlıq işləri görülür.
Şəki Turizm İnformasiya Mərkəzinin rəhbəri Nəsib İmaməliyev AZƏRTAC-a bildirmişdir ki, müsabiqənin vaxtı yaxınlaşdıqca, əhalinin, xüsusilə yerli sənətkarlar və turizm sektorunda çalışan insanların bu möhtəşəm musiqi bayramına marağı da artır. Müsabiqə ərəfəsində və müsabiqə günlərində respublikamıza minlərlə turistin, xarici ölkə vətəndaşlarının gələcəyini, habelə turistlərin bu bölgəyə gözlənilən səfərlərini nəzərə alaraq yerli sənətkarlar, mehmanxana və otel əməkdaşları, əlaqədar xidmət təşkilatlarının işçiləri öz fəaliyyətlərini bu istiqamətdə qurmağa səy göstərirlər.
Respublikamız üçün xüsusi əhəmiyyət kəsb edən bu mahnı müsabiqəsinin yüksək səviyyədə keçirilməsinə Şəki sənətkarları da layiqli töhfələrini verəcəklərini bildirirlər. “Yuxarıbaş” Tarix və Memarlıq Qoruğunun ərazisindəki “Sənətkarlar evi”nin nəzdində fəaliyyət göstərən müxtəlif el sənətkarları - ağac üzərində oyma, bədii tikmə, təkəlduz, ipəkçi, dulusçu, papaqçı, şəbəkə ustası və digər sənət sahibləri artıq əl işlərində “Eurovision- 2012” mahnı müsabiqəsinin loqosuna, embleminə xüsusi yer ayırırlar. Bu, heç də təsadüfi deyildir. Çünki son vaxtlar Şəkiyə gələn xarici turistlər “Eurovision- 2012” mahnı müsabiqəsi ilə bağlı elementlərin əks olunduğu suvenirlərə, bədii tikmə və ipəkçilik nümunələrinə daha çox üstünlük verirlər.
Şəki sənətkarlarından söz düşəndə, bu qədim diyarın özünəməxsus mətbəxini də unutmaq olmaz. Şəki şirniyyatı, halvası, pitisi artıq ölkəmizdən xaricdə də yaxşı tanınır.
Müsabiqə ərəfəsində və müsabiqə günlərində Şəkiyə gələcək qonaqların yerləşdirilməsi də başlıca məsələlərdən biridir. Bu barədə məlumat verən şəhər mədəniyyət və turizm şöbəsinin müdiri Aydın İbrahimxəlilov bildirmişdir ki, hazırda şəhərdəki mehmanxana və otellərdə, istirahət və turizm mərkəzlərində, Olimpiya İdman Kompleksinin kotejlərində 1000-ə yaxın turistin yerləşdirilməsi üçün hər cür şərait vardır. Zərurət yaranarsa, turistləri xüsusi evlərdə də yerləşdirmək mümkündür. Bu obyektlərdə xidmətin səviyyəsini yüksəltmək üçün bütün lazımi tədbirlər görülmüş, obyektlər sürətli internet şəbəkəsinə qoşulmuş, mehmanxana və otel əməkdaşları xüsusi treninqlərə cəlb edilmişlər.
Şəkiyə gələcək əcnəbilər bu qədim diyarın məşhur tarixi-memarlıq abidələri ilə də tanış olmaq imkanı əldə edəcəklər. Azərbaycan memarlığının nadir incisi, XVIII əsrə aid dünya əhəmiyyətli tarixi-memarlıq abidəsi, UNESCO-nun mədəni irs siyahısına daxil edilmiş Şəki xanlarının sarayı, habelə XVIII-XIX əsrlərə aid “Yuxarı Karvansaray” mehmanxana kompleksi, Kiş kəndindəki qədim alban məbədi və digər abidələrlə tanışlıq, şübhəsiz turistlərin böyük marağına səbəb olacaqdır. Əcnəbi qonaqlara Şəkinin qədim tarixi, memarlıq abidələri və özünəməxsus adət-ənənələri barədə dolğun məlumat verilməsi üçün bələdçilərin hazırlanmasına da xüsusi diqqət yetirilir.
Bir sözlə, qədim Şəki ilə tanışlıq qonaqların ürəyincə olacaqdır.
Bölmənin digər xəbərləri
