Fərid Mustafayev: Doğma arenada çıxış etmək bizə əlavə stimul verir
Bakı, 15 fevral, Həsrət Mahmudova, AZƏRTAC
Dünya kuboku yarışlarında ilk dəfədir mübarizə aparıram. Çıxışımdan razı qaldım. Yarış yüksək səviyyədə təşkil olunub.
AZƏRTAC xəbər verir ki, bu sözləri Bakıda keçirilən batut gimnastikası və tamblinq üzrə dünya kuboku yarışlarında finala vəsiqə qazanan gimnastımız Fərid Mustafayev deyib.
Hər iki proqramı uğurla yerinə yetirdiyini qeyd edən gimnast bildirib: “Finalda proqramımı dəyişməyi və çətinləşdirməyi düşünmürəm. Etiraf edim ki, doğma arenada çıxış etmək çox gözəldir. Azarkeşlərin dəstəyi isə möhtəşəmdir. Doğmalarım da mənə dəstək olmaq üçün arenaya gəliblər və bütün bunlar məni daha yaxşı çıxış etməyə ruhlandırır”.
İki gün davam edəcək dünya kuboku yarışlarında 30 ölkədən 150-dək gimnast mübarizə aparır. Yarış Tokio Yay Olimpiya Oyunlarına lisenziya xarakteri daşıyır.
Bölmənin digər xəbərləri
