Fərid Qayıbov: Azərbaycanda 100-dən artıq idman qurğusu fəaliyyət göstərir
Bakı, 2 iyun, AZƏRTAC
Heydər Əliyev adına İdman-Konsert Kompleksin təməli Ulu Öndər Heydər Əliyev tərəfindən 1976-cı ildə qoyulub. Buz meydançası bir müddət məşq zallarında olub. İndi isə Ümummilli Liderin 100 illiyinin qeyd edildiyi dönəmdə əsas zalda buz meydançası istifadəyə verilir. Dövlətimizin başçısı İlham Əliyevin idmana qayğısı nəticəsində Azərbaycanda 100-dən artıq idman qurğusu var. Artıq buz meydançası da fəaliyyət göstərəcək.
AZƏRTAC xəbər verir ki, bu sözləri gənclər və idman naziri Fərid Qayıbov iyunun 2-də Heydər Əliyev adına İdman-Konsert Kompleksində istifadəyə verilən buz meydançasının açılış mərasimindən sonra jurnalistlərə müsahibəsində deyib.
Nazir bildirib ki, burada qış idman növləri üzrə məşqlər keçiriləcək. Məşqçilər də artıq gəliblər. Bizə dəstək verdiyi, uşaqları bura toplamağımıza köməklik göstərdiyi üçün elm və təhsil naziri Emin Əmrullayevə təşəkkürümü bildirirəm. Uşaqların gəlib buranı görmələri bizim üçün çox vacib idi. İnanıram ki, onların da xoşuna gəldi.
“Məkanın adı dəyişdirilməyəcək. Burada digər idman növləri - MMA, gimnastika üzrə məşqlər də keçirilir. Eyni zamanda, fitnes zalı mövcuddur. Buzun funksiyaları da çoxdur. Buzu yığışdırıb, sonradan quraşdıra da bilərik. Yəni başqa tədbirlər də keçirmək mümkün olacaq. Amma istərdik ki, bu, daimi olsun”, - deyə nazir əlavə edib.
Bölmənin digər xəbərləri
