Filippində koronavirus pandemiyasına görə əcnəbilərin ölkəyə gəlişi qadağan edilib
Tokio, 17 mart, AZƏRTAC
Filippin hökuməti koronavirus pandemiyasının yayılmasının qarşısını almaq məqsədilə bir ay müddətinə əcnəbilərin bu ölkəyə gəlişinə qadağa qoyub.
Bu barədə Filippinin koronavirusla mübarizə üzrə işçi qrupu məlumat yayıb. Bildirilir ki, COVID-19 virusunun və onun ştamlarının digər ölkələrdən gətirilməsinin qarşısını almaq üçün əcnəbilərin və xaricdən gələn filippinlilərin ölkəyə girişi müvəqqəti qadağan edilir.
Qadağanın martın 20-dən aprelin 19-dək qüvvədə olacağı qeyd edilir. Yeni qadağanın xarici ölkələrin rəsmi nümayəndələrinə, ölkədə akkreditə olunmuş əcnəbi diplomatlara, xaricdə çalışan və evlərinə qayıtmaq istəyən filippinlilərə tətbiq edilməyəcəyi də bildirilir. Həmin müddətdə ölkəyə hər gün 1,5 minədək əcnəbinin gəlməsinə icazə veriləcək.
Qeyd edək ki, Filippində martın 13-də koronavirusun yeni ştammı aşkar edilib. İndiyədək 93 nəfərin P.3 adı alan yeni ştamma yoluxduğu bildirilir.
Son məlumatlara görə, Filippində 631 min 320 nəfər koronavirusa yoluxub.
Vüqar Ağayev
AZƏRTAC-ın xüsusi müxbiri
Tokio
Bölmənin digər xəbərləri
