Folklor İnstitutunda Beynəlxalq Ailə Gününə həsr olunmuş tədbir keçirilib
Bakı, 15 may, AZƏRTAC
Mayın 15-də AMEA-nın Folklor İnstitutunda elmi müəssisənin Qadınlar Təşkilatının dəstəyi ilə Beynəlxalq Ailə Gününə həsr olunmuş “Folklorda milli-mənəvi dəyərlər və ailə” mövzusunda tədbir keçirilib.
Bu barədə AZƏRTAC-a institutdan bildirilib. Tədbirdə institutun Folklor və yazılı ədəbiyyat şöbəsinin müdiri dosent Leyla Məmmədova bildirib ki, Azərbaycanda ailə bütün zamanlarda cəmiyyətimizin ən müqəddəs təməl daşı hesab olunub. Ümummilli Lider Heydər Əliyev Azərbaycan ailəsi və onun problemlərini həmişə diqqətdə saxlayıb. Bu münasibət indi də dövlət başçımız İlham Əliyev tərəfindən davam etdirilir. Qeyd olunub ki, ölkənin Birinci vitse-prezidenti, Heydər Əliyev Fondunun prezidenti Mehriban xanım Əliyevanın ailə, qadın və uşaq məsələlərinə, bu sahədə aktual problemlərə həssas münasibəti bunu bir daha təsdiq edir. Mehriban Əliyevanın təşəbbüsü ilə Heydər Əliyev Fondunun həyata keçirdiyi nəhəng proqram və layihələr ailələr üçün, sözün əsl mənasında, böyük dayaqdır. “Uşaq evləri və internat məktəblərinin inkişafı proqramı” çərçivəsində görülən işlər də, əslində, Azərbaycan ailəsinin rifahına, möhkəmlənməsinə xidmət edir.
Leyla Məmmədova “XIX əsr Azərbaycan dramaturgiyasında milli-mənəvi dəyərlər ailə kontekstində” mövzusunda məruzəsində bildirib ki, XIX əsr Azərbaycan dramaturgiyasında aktuallıq kəsb edən məsələlərdən biri də milli-mənəvi dəyərlərin təbliği idi. Milli dramaturgiyanın banisi Mirzə Fətəli Axundzadənin səhnə əsərlərinin əksəriyyətində, eləcə də Nəcəf bəy Vəzirovun pyeslərində milli-mənəvi dəyərlər məhz ailə kontekstində təqdim olunur.
Folklor və yazılı ədəbiyyat şöbəsinin aparıcı elmi işçisi dosent Gülnar Osmanovanın “Azərbaycan folklorunda və yazılı ədəbiyyatda ailə dəyərlərinin təcəssümü” mövzusunda məruzəsi dinlənilib. Məruzəçi qeyd edib ki, ailə dəyərlərinin qorunub saxlanılaraq gələcək nəsillərə ötürülməsi, gənclərin yaşlılara hörmət ruhunda tərbiyə olunması, ailədə sülh və dözümlülük mədəniyyətinin, sağlam həyat tərzinin təbliği günümüzün aktual problemlərindəndir.
“Dastanlarımızda ailə dəyərləri” mövzusunda məruzə edən Folklor İnstitutunun Qadınlar Təşkilatının sədri Xəyalə Ağayeva qeyd edib ki, ədəbiyyat digər təsisatlardan, dindən, fəlsəfədən götürdüyü modelləri konkret olaraq həyat materialının əsasında mənəvi-əxlaqi dəyərlərin təbliğinə yönəldir. Yazılı ədəbiyyatda milli-mənəvi dəyərlərin təbliği yazıçının şüurlu şəkildə qarşısına qoyduğu məqsəd ola bilər. Folklorda isə janrın etnik yaddaşda mövcudluğunun səbəbi elə bu dəyərlərin nəsildən-nəslə ötürülməsi və mənimsənilməsidir.
Tədbirdə institutun əməkdaşları “Qaliblər anası – Azərbaycan qadını”, “Məişət mərasimlərində milli stereotiplərə bağlı ailə dəyərləri” və “Ailə dəyərləri və folklor: unudulmazlıqla yaşayan mədəniyyət” mövzularında çıxış ediblər.
Bölmənin digər xəbərləri
