Hörmətli iclas iştirakçıları!

Azərbaycanın müasir tarixinin böyük, həm də şərəfli bir dövrü müstəqil Azərbaycan dövlətçiliyinin memarı və qurucusu, ölkəmizin müstəqilliyini, xalqımızın tərəqqisini və xoşbəxtliyini özünün başlıca fəaliyyət istiqaməti kimi müəyyənləşdirən, dünya siyasətçiləri arasında nüfuzu və uzaqgörənliyi ilə seçilən, Azərbaycanı dağılmaq təhlükəsindən qoruyan və dünya dövlətləri arasında tanıdan ulu öndərimiz Heydər Əliyevin adı və fəaliyyəti ilə bağlıdır. Fəxrlə deyə bilərik ki, ümummilli liderimizin qurucusu olduğu müstəqil Azərbaycanın dövlətçilik ənənələri və bütövlükdə Heydər Əliyev ideyaları möhtərəm Prezidentimiz cənab İlham Əliyevin rəhbərliyi altında yaşayır, uğurla davam etdirilir və möhkəmləndirilir.

Son illər dünyanın üzləşdiyi qlobal iqlim dəyişiklikləri ilə bağlı yaranmış kataklizmlər, genişmiqyaslı meşə yanğınları və digər təbii fəlakətlər, eyni zamanda, zəngin karbohidrogen ehtiyatlarına malik olan ölkəmizdə bu ehtiyatlardan istifadə edildikcə, neft-qaz hasilatı və emalı obyektlərində, magistral boru kəmərlərində, irimiqyaslı tikinti işlərində və transmilli layihələrin həyata keçirilməsi zamanı texnogen mənşəli qəzaların baş vermə ehtimalını minimuma endirmək, o cümlədən əhalinin, ərazilərin və infrastruktur obyektlərinin təhlükəsizliyinin təmin edilməsi məsələsi dövlətin prioritet vəzifələrindən birinə çevrilir.

Möhtərəm cənab Prezident!

Məhz elə bu səbəblərdən də ölkədə təbii fəlakətlərin, texnogen xarakterli qəzaların və yanğınların xəbərdar edilməsi, qarşısının alınması və nəticələrinin aradan qaldırılmasını, belə hallarda xilasetmə və bərpa işləri üzrə müvafiq orqanların fəaliyyətinin vahid mərkəzdən idarə olunmasını təmin etmək məqsədi ilə 2005-ci ilin dekabrında Azərbaycan Respublikası Fövqəladə Hallar Nazirliyinin yaradılması haqqında Zati-aliniz tərəfindən müdrik qərar qəbul edilməsi respublika ictimaiyyəti tərəfindən rəğbətlə qarşılandı. Nazirliyin fəaliyyətinin təşkil edilməsi və strukturunun formalaşdırılması məqsədi ilə imzaladığınız fərman və sərəncamlar, habelə göstərişinizlə lazımi maliyyə vəsaitinin ayrılması qısa müddət ərzində ciddi struktur islahatları aparılmasına, tabeliyimizə verilən qurumların maddi-texniki bazasının əhəmiyyətli dərəcədə möhkəmləndirilməsinə, işçilərin sosial təminatının yaxşılaşdırılmasına şərait yaratdı.

İcazə verin, nazirliyin yaradılmasından keçən qısa dövr ərzində gördüyümüz işlər barədə məlumat verim.

Bu müddət ərzində nazirliyin normativ hüquqi bazasının təkmilləşdirilməsi üçün onlarca normativ hüquqi akt hazırlanmış, qüvvədə olan qanunvericilik aktlarına əlavələr və dəyişikliklər edilmiş, dövlət agentlikləri və xidmətlərinin əsasnamələri, nazirliyin və onun müvafiq qurumlarının rəmzləri, eləcə də hərbi qulluqçularının və xüsusi rütbəsi olan əməkdaşlarının geyim forması və fərqləndirmə nişanları Zati-aliləriniz tərəfindən təsdiq edilmişdir.

Möhtərəm cənab Prezident, nazirliyin yaradılmasının ikinci ildönümünə həsr olunmuş texnika və şəxsi heyətin sıra baxışında bilavasitə iştirakınız nazirliyin fəaliyyətinə yüksək səviyyədə diqqət və qayğınızın təzahürü olmaqla, orada verdiyiniz konkret göstəriş və tövsiyələr kollektivimizin hər bir üzvünün fəaliyyət istiqaməti kimi qəbul edildi. Tapşırıqlarınıza uyğun olaraq, 2008-ci ildə də bu sahədə gördüyümüz işləri davam etdiririk. Belə ki, yanğınsöndürmə və digər xilasetmə funksiyalarını həyata keçirən 1 ədəd “BE-200” amfibiya tipli xüsusi təyinatlı təyyarənin, yanğınsöndürmə, təcili və qəza-xilasetmə işlərində istifadə olunmaq üçün 12 ədəd qəza-xilasetmə avtomobilinin, 14 ədəd ağır texnikanın, 100-dən çox müxtəlif təyinatlı xüsusi nəqliyyat vasitələrinin alınması üçün müvafiq prosedurlar başa çatdırılmışdır.

Əsaslı vəsait qoyuluşu hesabına nazirliyin mərkəzi aparatının yeni inzibati binasının və digər 12 obyektin tikintisi başa çatdırılmışdır.

Dənizdə qəza-xilasetmə işləri üzrə regionda yeganə ixtisaslaşdırılmış qurum olan Xəzər Hövzə Qəza-Xilasetmə Xidmətinin maddi-texniki bazasının genişləndirilməsi və işinin müasir tələblərə uyğun qurulması üçün Xidmətin istifadəsində olan köhnə gəmilərin təmiri və yeni gəmilərin alınması üzrə danışıqlar aparılır.

Cənab Prezident, son hadisələr, yəni vertolyot və bu yaxınlarda təyyarə qəzasının nəticələrinin aradan qaldırılmasında Xidmətin iştirakı göstərdi ki, onun imkanlarından sularda axtarış-xilasetmə işlərinin həyata keçirilməsində istifadə etməklə yanaşı, neft dağılmalarının nəticələrinin aradan qaldırılmasında və hidrotexniki qurğuların texniki təhlükəsizliyinin təmin edilməsində də geniş istifadə edilə bilər. Lakin bu Xidməti təkcə büdcə vəsaiti hesabına saxlamaq mümkün olmadığından, Zati-alinizin müvafiq fərmanına uyğun olaraq, qurum özünümaliyyələşdirmə prinsipi ilə işləməyə keçirilmişdir. Belə hesab edirik ki, dənizdə karbohidrogen ehtiyatlarının hasilatı və nəqli, habelə hidrotexniki qurğuların istismarı ilə məşğul olan təsərrüfat subyektlərinin bu qurumun xidmətlərindən ödənişli əsaslarla istifadə etməsi məqsədəuyğun olardı.

Radioaktiv çirklənmələrin qiymətləndirilməsi, onu yaradan səbəblərin aşkar edilməsi və radioaktiv tullantıların zərərsizləşdirilməsi istiqamətində konkret işlər görülür. Xarici mütəxəssislər və yüksək vəzifəli qonaqlar tərəfindən də bu sahədə regionda analoqu olmayan qurum kimi qiymətləndirilən “İzotop” Xüsusi Kombinatının radioaktiv mənbələrin saxlanılma məntəqəsinin yenidən qurulması işləri başa çatdırılmış, Avropa Birliyinin və ABŞ Enerji Departamentinin qrantı, eləcə də Azərbaycan dövlətinin ayırdığı vəsait hesabına radioloji laboratoriya, radioaktiv tullantıların emalı bloku və yüksək aktivli mənbələrin saxlanılması bloku istifadəyə verilmişdir.

Böhran Vəziyyətlərində İdarəetmə Mərkəzində qısa müddət ərzində “112 zəng mərkəzi” (“qaynar xətt”) yaradılaraq fəaliyyətə başlamış, Sumqayıt şəhəri və Abşeron rayonu ərazilərindəki şəhərdaxili telefonlardan da bu xidmətə zənglərin daxil olması imkanı yaradılmışdır. Hazırda bu xidmət Naxçıvan Muxtar Respublikasında da fəaliyyətə başlamış, bu istiqamətdə digər regionlarda da işlər aparılır. Qeyd etmək istərdim ki, müxtəlif xilasedici avadanlıq və motosikletlərlə təmin olunmuş xilasedicilər məişət və avtomobil qəzaları zamanı xilasetmə əməliyyatlarını və zərərçəkmişlərə ilkin yardım göstərilməsini daxil olan zənglər üzrə çağırışlar əsasında təmin edirlər.

Bununla yanaşı, bu sahədə kifayət qədər təcrübəsi olan Rusiya, Fransa, Belarus və Koreya Respublikası kimi dövlətlərin təcrübəsi öyrənilir və qısa zamanda müasir tələblərə cavab verən Mərkəzin tikintisinə və yaradılmasına başlanılacaqdır.

Yeri gəlmişkən qeyd edim ki, fövqəladə hallarda aviasiya-xilasetmə işlərini və nazirliyə məxsus hava daşımalarını həyata keçirmək məqsədi ilə yaradılmış aviasiya dəstəsi üçün alınmış vertolyotların və yaxın vaxtlarda ölkəyə gətiriləcək təyyarənin, habelə nazirliyin digər qurumlarının imkanlarından da istifadə etməklə müvafiq avadanlıq, yanğınsöndürmə texnikası, mobil hospital və digər zəruri texniki vasitələrlə təchiz olunmuş 300 nəfər xilasedicinin xarici ölkələrdə xilasetmə işlərinə cəlb edilməsi təmin edilə bilər.

Cənab Prezident, tikintidə təhlükəsizliyə nəzarəti həyata keçirmək məqsədi ilə əsasnaməsi tərəfinizdən təsdiq edilməklə yaradılan Tikintidə Təhlükəsizliyə Nəzarət Dövlət Agentliyinin fəaliyyəti təmin olunmuş, Sizin “Azərbaycan Respublikasında tikinti sahəsində dövlət nəzarətinin gücləndirilməsi haqqında” məlum Fərmanınızı rəhbər tutaraq, tikinti-layihə sənədlərinin dövlət ekspertizasının həyata keçirilməsi, obyektlərin istismara qəbul edilməsi və tikinti işlərinin dayandırılması ilə bağlı müvafiq qaydaların layihələri hazırlanmış və Nazirlər Kabinetinə təqdim olunmuşdur. Bakı şəhərində inşa olunan 200-ə yaxın çoxmərtəbəli binada Agentlik tərəfindən texniki müayinə tədbirləri həyata keçirilmiş, 14 binada ciddi pozuntular aşkar olunmuş, layihə sənədlərinə ekspertiza rəyi olmayan 82 obyektdə tikinti işləri nöqsanlar aradan qaldırılana kimi dayandırılmışdır.

Yeri gəlmişkən qeyd edim ki, hazırda bu kimi müayinələri aparmaq üçün istifadə olunan ən müasir texniki vasitələr alınaraq, əməkdaşlarımız müvafiq təcrübə keçdikdən sonra tətbiq edilir.

Yüksəkmərtəbəli binalar üzrə aparılan müayinələr nəticəsində tikilməkdə olan 239 binanın layihəsinə ekspert rəyinin olmadığı, 23 binanın layihəsinə mənfi ekspert rəyi verildiyi, habelə Dövlət Qəbul Komissiyası tərəfindən istismara qəbul edilməmiş 108 binanın faktik olaraq istifadəyə verildiyi aşkar edilmişdir.

Tikilməkdə və istismarda olan bütün çoxmərtəbəli binaların tikinti normaları və qaydalarına uyğunluğu, habelə istifadə edilən tikinti materialları və konstruksiyaların keyfiyyəti yoxlanılmaqla 400-ə yaxın bina üzrə müayinə işləri artıq başa çatmış, 31 binada ciddi pozuntular aşkar olunmuşdur.

Nazirliyin sənayedə və dağ-mədən işlərində təhlükəsizliyə nəzarəti həyata keçirən qurumu tərəfindən təkcə 2007-ci ildə 2500-ə yaxın hüquqi və fiziki şəxsə məxsus 52000-dən çox qurğu və avadanlıq dövlət reyestrində qeydiyyatdan keçirilmiş, 3733 müəssisədə 29 mindən çox qurğu və avadanlıq texniki müayinə olunmuş, 13791 halda texniki təhlükəsizlik qaydaları və normalarının pozulması faktı aşkar edilmiş, görülmüş əməli tədbirlər nəticəsində bu pozuntulardan 10570-i qısa vaxtda aradan qaldırılmışdır.

Naxçıvan Muxtar Respublikasının Fövqəladə Hallar Nazirliyi 22 ədəd xüsusi texnika, sularda xilasetmə işlərini həyata keçirmək üçün 2 ədəd kater, 10 ədəd yanğınsöndürmə maşını, şəxsi heyət üçün yeni geyim formaları ilə təmin edilmişdir. Nazirliyin Dövlət Yanğından Mühafizə Hissəsinin və Kəngərli rayon bölməsinin inzibati binalarının tikintisi davam etdirilir.

Cənab Prezident, nazirliyin təsdiq etdiyiniz strukturuna uyğun olaraq, əhalinin və ərazilərin fövqəladə hallardan qorunmasının operativ surətdə təmin edilməsi məqsədi ilə 9 regional mərkəzin fəaliyyətinin təşkili üçün tədbirlər görülür. Nazirliyin 4 regional mərkəzinin inzibati binalarında təmir-tikinti işləri başa çatmaq üzrədir, 4 regional mərkəzinin isə inzibati binalarında tikinti-quraşdırma işləri davam etdirilir.

Ali təhsilli mütəxəssislər hazırlamaq məqsədi ilə 70-ə yaxın əməkdaşımız Rusiya, Ukrayna və Belarusun müvafiq tədris müəssisələrinə təhsil almağa göndərilmişdir.

Nazirliyin fəaliyyət istiqamətlərinə uyğun olaraq, 2008-ci ildə “Azərbaycan Respublikasının Tikinti Məcəlləsi”nin, “Fövqəladə halların qarşısının alınması və nəticələrinin aradan qaldırılması üzrə” Azərbaycan Respublikasının Milli Konsepsiyasının, “Əhalinin və ərazilərin fövqəladə hallardan mühafizəsi haqqında”, “Fövqəladə hallar orqanlarında qulluqkeçmə haqqında”, “Qəza-xilasetmə xidmətləri və xilasedicilərin statusu haqqında”, “Fövqəladə hallar haqqında” və “Material ehtiyatları haqqında” qanun layihələrinin hazırlanması başa çatdırılacaqdır.

Yeri gəlmişkən qeyd edim ki, dövlət və səfərbərlik ehtiyatlarının idarə olunmasını həyata keçirən Dövlət Material Ehtiyatları Agentliyinin normal fəaliyyət göstərməsi və bununla bağlı məsələlərin həll edilməsi üçün hökumətin dəstəyi ilə müvafiq dövlət komissiyası yaradıldıqdan, saxlanılan mövcud maddi dəyərlərin inventarizasiyası aparılmaqla vaxtı keçmiş və istifadəyə tam yararsız mal və materialların çıxdaş edilməsi, ehtiyatların nomenklaturası və normalarına yenidən baxılması məsələsi həll edildikdən sonra ehtiyatların formalaşdırılması istiqamətində iş aparılacaqdır.

Möhtərəm cənab Prezident!

İcazə verin, əməkdaşlarımıza ali rütbələrin verilməsində və işçilərimizin maddi vəziyyətinin yaxşılaşdırılmasında və bütövlükdə kollektivimizə göstərdiyiniz yüksək diqqət və qayğıya görə Zati-alilərinizə bir daha dərin minnətdarlığımızı çatdırım. Böyük əminliklə bildirirəm ki, taleyüklü proqramların həyata keçirilməsi üçün əsas olan sabitliyin və onun dönməzliyinin qorunub saxlanılması, vətəndaşlarımızın əmin-amanlığı, ölkəmizin tərəqqisi və iqtisadi inkişafı, onun regionda lider dövlətə çevrilməsi istiqamətindəki yorulmaz və qətiyyətli siyasətinizin həyata keçirilməsində rəhbərliyiniz altında iştirak edəcək, respublikamızın yeraltı və yerüstü sərvətlərinin, eləcə də əhalinin və ərazilərin təbii və texnogen xarakterli fövqəladə hallardan qorunması üçün bundan sonra da bütün qüvvə və səylərimizi əsirgəməyəcəyik!

Diqqətinizə görə sağ olun!