Fransanın “Bvoltaire” portalı Dağlıq Qarabağ münaqişəsindən yazır
Paris, 11 noyabr, AZƏRTAC
Fransanın “Bvoltaire” portalı “Ermənistan Azərbaycana qarşı: bəs Fransa nə edir?” sərlövhəli məqalə yayıb.
Məqalədə dünyadakı mövcud münaqişələr arasında Ermənistan-Azərbaycan, Dağlıq Qarabağ probleminin daha təhlükəli olduğu, bu münaqişənin dondurulduğu vaxtdan on illər keçməsinə baxmayaraq, iki ölkə arasında gərginliyin həllini tapmadığı, Dağlıq Qarabağın Azərbaycanın əzəli ərazisi olduğu diqqətə çatdırılır. Eyni zamanda, bildirilir ki, Fransa həmsədr dövlət kimi problemin həlli ilə məşğul olsa da, bir irəliləyiş əldə edilməyib. Müəllif xatırladır ki, çar Rusiyasının apardığı siyasət nəticəsində XIX əsrin əvvəllərində Türkiyə və İrandan yüz minlərlə erməni köçürülərək Azərbaycanın müxtəlif regionlarında, o cümlədən Dağlıq Qarabağda yerləşdirilib. Məhz bu köçürülmə nəticəsində bölgədə ermənilərin sayı artıb və keçən əsrin sonlarında Dağlıq Qarabağ erməniləri öz müqəddəratlarını təyin etmək kimi mənasız fikrə düşüblər. SSRİ-nin süqutundan sonra Ermənistan bölgədə yaşayan ermənilərin hüquqlarını “müdafiə etmək” bəhanəsi ilə Azərbaycana qarşı elan olunmamış müharibə aparmağa başlayıb.
Məqalədə oxuculara 1994-cü ildə hər iki ölkə arasında atəşkəs barədə razılıq əldə edilməsi, müharibə zamanı minlərlə insanın həlak olması, bir milyondan artıq azərbaycanlının doğma torpaqlarından didərgin salınaraq öz vətənlərində qaçqın və məcburi köçkün həyatı yaşaması barədə ətraflı məlumat verilib. Bundan başqa, Ermənistanın işğal etdiyi əraziləri Azərbaycana qaytarmaqdan boyun qaçırdığı, 1992-ci ildə münaqişənin sülh yolu ilə həllinə cavabdeh üç ölkənin - Fransa, Rusiya və ABŞ-ın həmsədrliyi ilə ATƏT-in Minsk qrupunun yaradıldığı qeyd olunub. Fransanın Azərbaycan və Ermənistan prezidentlərinin görüşlərinin dəfələrlə təşəbbüskarı olduğu vurğulanan məqalədə bu görüşlərin çoxunun nəticəsiz qaldığı, Ermənistanın heç bir beynəlxalq təşkilat və ölkə tərəfindən tanınmayan oyuncaq “Dağlıq Qarabağ respublikası”nın da danışıqlara cəlb edilməsi istiqamətində səylərinin boşa çıxdığı bildirilib. Azərbaycanın öz ərazilərinin işğalı ilə heç vəchlə barışmayacağı, danışıqlar nəticə verməsə, həmsədr ölkələr qarşısında da dəfələrlə bildirdiyi kimi, torpaqlarını azad etmək üçün digər imkanlardan istifadə edəcəyi diqqətə çatdırılıb.
Əsgər Əliyev
AZƏRTAC-ın xüsusi müxbiri
Paris
Bölmənin digər xəbərləri
