ELM VƏ TƏHSİL
“Gənclər üçün akademik Əli Quliyev mükafatı” müsabiqəsi keçirilir
![“Gənclər üçün akademik Əli Quliyev mükafatı” müsabiqəsi keçirilir](/files/2020/1/1200x630/1587715977815741960_1200x630.jpg)
Bakı, 24 aprel, AZƏRTAC
Azərbaycan Milli Elmlər Akademiyasının akademik Əli Quliyev adına Aşqarlar Kimyası İnstitutunda gənc alim və mütəxəssislər arasında institutun yaranmasının 55 illiyinə həsr olunan “Gənclər üçün akademik Əli Quliyev mükafatı” müsabiqəsi keçiriləcək.
Aşqarlar Kimyası İnstitutundan AZƏRTAC-a bildirib ki, mükafatın əsasnaməsinə uyğun olaraq, müsabiqədə institutda çalışan və yüksək elmi nəticə göstərən gənc alimlər iştirak edə bilər. Namizədlərin seçimi bir neçə meyar əsasında aparılacaq. Meyarlara namizədlərin əldə etdiyi nəticələrin elmi və praktik əhəmiyyəti, nüfuzlu xarici (impakt faktoru yüksək olan) jurnalda dərc olunan məqalələri, xarici ölkələrdə beynəlxalq konfranslarda məruzə etməsi, əhəmiyyətli patent alması, elmi əsərlərinə olan istinadlar daxildir.
Qeyd olunub ki, koronavirus pandemiyası ilə əlaqədar Azərbaycanda ölkə səviyyəsində karantin rejimi tətbiq olunduğu üçün müsabiqəyə sənədlər onlayn rejimdə qəbul edilir.
Müsabiqədə Ekspert Komissiyasının yekun rəyi əsasında I, II və III yerlər üzrə qaliblər seçiləcək, onlara diplom və pul mükafatları təqdim olunacaq. Əgər karantin rejimi uzadılarsa müsabiqə qaliblərinin təqdimatı “Zoom” platforması üzərindən onlayn rejimdə keçiriləcək.