REGİONLAR
Gipsdən heykəllər hazırlayan Lənkəran sakini: Məhsulları sosial şəbəkələr vasitəsilə satıram FOTO VİDEO
Lənkəran, 6 mart, İlkin Adıyev, AZƏRTAC
“Suvenirlər yaxınlarımızı sevindirmək üçün ala biləcəyimiz ən gözəl hədiyyələrdir. Bu, özəl günləri, gözəl anları ölümsüz və unudulmaz etməyə, gələcəyə daşımağa xidmət edən ən yaxşı yoldur. Sizi əmin edirəm ki, sevdiyiniz insanı sevindirmək üçün kiçik və mənalı bir hədiyyə onu xoşbəxt etməyə kifayət edəcək”. Bu sözlər Lənkəran sakini, dekorativ-tətbiqin sənətin bir neçə növü ilə məşğul olan Aysel Sadıqlıya məxsusdur. Gipsdən hazırladığı heykəllər onun yaradıcılığının şah əsərləridir. O, maraqlı və gözoxşayan əl işləri ilə görənlərin diqqətini cəlb etməklə yanaşı, müştərilərinin də məmnuniyyətini qazana bilib.
AZƏRTAC-ın bölgə müxbiri Aysel Sadıqlının yaradıcılığı ilə maraqlanıb, onun əl işləri ilə yaxından tanış olub.
Aysel Sadıqlı ixtisasca müəllim olmasına baxmayaraq, evdə müxtəlif əl işləri hazırlayır. Onun əl işləri sırasına gipsdən heykəllər, lentdən hazırlanan güllər, yağlı boya ilə kətan, divar və çay daşları üzərində rəsmlər daxildir.
“Uşaq yaşlarımdan rəsm çəkməyə böyük həvəsim olub. Yaşım az olsa da, gözəl rəsmlər çəkə bilirdim. Bu həvəs məni Lənkəran Dövlət Humanitar Kollecinin "Təsviri İncəsənət müəllimliyi" ixtisasına qədər aparıb çıxardı. Dörd il ərzində oranı əla qiymətlərlə başa vurub, müəllimlik sənətinə yiyələndim. Daha sonra internet vasitəsilə gipsdən hazırlanan heykəllərlə tanış oldum, çox xoşuma gəldi. İlk baxışdan diqqətimi cəlb etdiyi üçün düşündüm ki, mən də bu işlə məşğul ola bilərəm. “Niyə də etməyim” dedim və başladım bu işdə özümü sınamağa. Bir heykəl qəlibi aldım, bir dəfə hazırladım, gips tökdüm alınmadı. İkinci dəfə alınmadı, amma üçüncü dəfə heykəl təsəvvür etdiyimdən də yaxşı formada qəlibdən çıxdı. Daha sonra onu rənglədim və fərqli aksesuarlarla bəzədim. Sonda gördüm ki, bu, məndə alınır. Artıq iki ildir böyük sevgi ilə bu əl işlərini hazırlayıram” , - deyə Aysel Sadıqlı bildirib.
Müsahibim deyir ki, hər hansı bir yeni ideya üzərində işləməyə başlayarkən öncədən onun necə alınacağını təxmin etməlisən: “Bir əl işini hazırlamazdan əvvəl təsəvvürümdə olan həmin fiqurun şəklini çəkir, ölçülərini təyin edirəm. Sonra 3D printer vasitəsi ilə həmin fiqurun qəlibini hazırlayıram. Daha sonra isə gipsləmə və qurutma prosesi başlayır. Bu arada materialın keyfiyyətinə xüsusi fikir verirəm. Yaratdığım bu heykəllərin əsas özəlliyi isə onların içinin boş olmasıdır ki, buraya qələm və ya digər əşyalar yığmaq olur”.
Aysel xanım bildirir ki, əldə etdiyi nailiyyətlərə görə ailəsinə və həyat yoldaşına minnətdardır: “Həyat yoldaşım rəssam olduğu üçün bəxtim gətirib. Bütün əl işlərimdə o, yaxından köməklik göstərir. Bu işlərə sevgi və həsaslıqla yanaşırıq. Onun mənə olan dəstəyi işimə olan sevgi və həvəsimi daha da artırır. Bəlkə də, bizim işlərimiz buna görə daha çox diqqət çəkir”.
İstedadlı rəssam müştərilərinin qiymətdən razı qaldığını bildirir: “Sifarişlərim daha çox hörüklü qız heykəllərinə olur. Ona görə də bu heykəllərə daha çox üstünlük verirəm. Satışlarımı sosial şəbəkələr üzərindən həyata keçirirəm. Ölkəmizin bütün rayonlarında mənim əl işlərim var”.
Aysel Sadıqlı qeyd edir ki, insan bacardığı işi ortaya çıxara bilirsə, zamanla bu, onu bir sənət sahibi edir. Bu işlərlə məşğul olmaq istəyirsənsə, gərək həmin işdən bezməyəsən. Çünki həyatda bacarıqsız insan yoxdur. Sadəcə öz üzərində çalışıb istedadını ortaya qoymalısan.