AZƏRTAC-ın müxbiri xəbər verir ki, Korrupsiyaya Qarşı Mübarizə Fondu qeyri-hökumət təşkilatı və Azərbaycanda Vətəndaş Cəmiyyətinin İnkişafına Yardım Assosiasiyası Göyçayda korrupsiyaya qarşı mübarizəyə həsr olunmuş dəyirmi masa keçirmişlər. Ağsaqqalların, ziyalıların, gənclərin və bir sıra KİV nümayəndələrinin qatıldığı tədbiri fondun icraçı direktoru Vasif Mövsümov korrupsiya və rüşvətxorluq kimi təhlükəli bəlaya qarşı ümumxalq mübarizəsinin zəruriliyindən, bununla bağlı ictimai maarifləndirmə işlərindən, fondun problemlə əlaqədar hazırladığı layihədə əksini tapmış müddəalardan bəhs etmişdir.
Digər natiqlər də korrupsiya və rüşvətxorluğa qarşı hamılıqla mübarizə aparılmasının vacibliyini bildirmiş, Azərbaycan Prezidenti İlham Əliyevin səhiyyə və iqtisadi inkişaf nazirləri ilə bağlı son sərəncamlarının, hüquq mühafizə orqanlarının araşdırmalarının xalq tərəfindən dərin razılıq hissə ilə qarşılandığını, dövlətimizin başçısının korrupsiyaya qarşı mübarizədə son dərəcə israrlı olduğunu qeyd etmişlər.
