Güclü dövlət, güclü ordu, güclü lider
Bakı, 24 iyun, AZƏRTAC
Müasir dövlətçilik anlayışında güclü ordu yalnız hərbi qüdrətin göstəricisi deyil, həm də dövlətin müstəqilliyinin, milli təhlükəsizliyinin və suverenliyinin əsas təminatçısıdır. Azərbaycan da müstəqilliyini bərpa etdikdən sonra qarşısında duran ən mühüm vəzifələrdən biri kimi güclü milli ordunun formalaşdırılmasını müəyyənləşdirib. Bu gün 26 İyun - Silahlı Qüvvələr Günü münasibətilə Azərbaycan Ordusunun keçdiyi inkişaf yoluna nəzər saldıqda aydın görünür ki, əldə olunan uğurlar təsadüfi deyil. Bu uğurların təməlində uzun illər ərzində həyata keçirilən məqsədyönlü dövlət siyasəti, milli maraqlara əsaslanan strateji qərarlar və xalqın öz ordusuna olan böyük etimadı dayanır.
Bu fikirləri AZƏRTAC-a açıqlamasında Milli Məclisin deputatı Tahir Mirkişili bildirib. O bildirib ki, Azərbaycanın müasir ordu quruculuğunun ideoloji və institusional əsasları Ümummilli Lider Heydər Əliyev tərəfindən formalaşdırılıb. Hələ sovet dövründə Azərbaycanın gələcək hərbi potensialını düşünən Ulu Öndər milli hərbi kadrların hazırlanmasını prioritet vəzifələrdən biri kimi müəyyən etmişdi. Məhz onun təşəbbüsü ilə yaradılan Cəmşid Naxçıvanski adına Hərbi Lisey sonrakı dövrdə minlərlə peşəkar zabit və hərbçinin yetişməsində mühüm rol oynadı. Azərbaycanın müstəqillik əldə etməsindən sonra isə Ulu Öndərin hakimiyyətə qayıdışı ilə ölkədə nizami ordu quruculuğu prosesi sistemli xarakter aldı. 1990-cı illərin mürəkkəb siyasi və hərbi şəraitində Azərbaycanın dövlət müstəqilliyini qoruması, daxili sabitliyi təmin etməsi və gələcək inkişafının əsasını qoyması məhz güclü dövlət idarəçiliyi və ordu quruculuğu siyasəti sayəsində mümkün oldu. Hər bir ordunun döyüş qabiliyyətini müəyyən edən əsas amillərdən biri onun mənəvi gücüdür.
Deputat Azərbaycan Ordusunun ən böyük üstünlüyünün məhz xalqla olan ayrılmaz bağlılığında, vətənpərvərlik ruhunda və dövlətə sədaqətində özünü göstərdiyini, Ulu Öndər Heydər Əliyevin “Ordu xalqın bir hissəsidir” fikrinin bu gün də Azərbaycan dövlətinin hərbi siyasətinin əsas prinsiplərindən biri olaraq qaldığını bildirib: “Azərbaycan əsgəri yalnız hərbi xidmət keçən şəxs deyil, həm də xalqın iradəsini, dövlətin gücünü və milli dəyərləri təmsil edən vətəndaşdır. Məhz buna görə də ölkəmizdə gənc nəslin vətənpərvərlik ruhunda tərbiyəsi, hərbi xidmətə hazırlığı və milli-mənəvi dəyərlərə bağlılığı dövlət siyasətinin mühüm istiqamətlərindən biri hesab olunur”.
O, Prezident İlham Əliyevin rəhbərliyi ilə Azərbaycan Ordusunun öz inkişafının ən dinamik və uğurlu mərhələsinə qədəm qoyduğunu, son illərdə həyata keçirilən hərbi islahatlar, müdafiə sənayesinin inkişafı, müasir texnologiyaların tətbiqi və beynəlxalq hərbi əməkdaşlığın genişləndirilməsinin Silahlı Qüvvələrin keyfiyyətcə yeni səviyyəyə yüksəlməsinə şərait yaratdığını qeyd edib: “Ordunun maddi-texniki bazasının gücləndirilməsi, ən müasir silah və texnikalarla təchiz edilməsi, hərbi qulluqçuların sosial müdafiəsinin gücləndirilməsi və peşəkar hazırlığın artırılması istiqamətində görülən işlər Azərbaycanın müdafiə potensialını əhəmiyyətli dərəcədə artırdı. Bu siyasətin nəticəsində Azərbaycan Ordusu təkcə regionun deyil, dünyanın nüfuzlu hərbi reytinqlərində ön sıralarda qərarlaşan silahlı qüvvələrdən birinə çevrildi”.
Deputat bildirib ki, Azərbaycan Ordusunun gücü illər ərzində keçirilən təlimlərdə, hərbi əməliyyatlarda və beynəlxalq missiyalarda özünü göstərsə də, onun əsl qüdrəti 2020-ci ildə bütün dünyaya nümayiş etdirildi.
44 günlük Vətən müharibəsi Azərbaycanın müasir tarixinin ən şanlı səhifələrindən biridir. Prezident, Silahlı Qüvvələrin Ali Baş Komandanı İlham Əliyevin rəhbərliyi ilə həyata keçirilən uğurlu hərbi strategiya nəticəsində Azərbaycan Ordusu 30 ilə yaxın işğal altında qalan torpaqlarımızı azad etdi. Bu Qələbə yalnız hərbi uğur deyil, eyni zamanda, milli iradənin, xalq–ordu birliyinin və dövlət siyasətinin təntənəsi idi. Azərbaycan əsgəri sübut etdi ki, Vətən sevgisi, peşəkarlıq və yüksək döyüş ruhu qarşısında heç bir maneə dayana bilməz. Müharibədən sonrakı mərhələdə Azərbaycan Ordusunun inkişafı daha da sürətlənib. Komando birliklərinin yaradılması, xüsusi təyinatlı qüvvələrin gücləndirilməsi, hərbi təhsil sisteminin yenidən qurulması və Türkiyə Silahlı Qüvvələrinin təcrübəsinə uyğun islahatlar ordumuzun gələcək inkişaf strategiyasının əsas istiqamətlərini təşkil edir. Milli Müdafiə Universitetinin yaradılması, hərbi kolleclərin fəaliyyətə başlaması və yeni nəsil zabit korpusunun formalaşdırılması Azərbaycanın müdafiə qabiliyyətinin uzunmüddətli perspektivdə daha da möhkəmlənməsinə xidmət edir. Müasir dövrün təhlükəsizlik çağırışları göstərir ki, güclü ordu yalnız bugünkü deyil, həm də gələcək nəsillərin təhlükəsizliyinin təminatıdır”, - deyə o vurğulayıb.
Tahir Mirkişili əlavə edib ki, dövlətimizin müstəqil siyasəti, iqtisadi potensialı və hərbi qüdrəti regionda yeni reallıqlar formalaşdırır. Ordumuzun əldə etdiyi nailiyyətlər nəticəsində Azərbaycanın milli maraqları etibarlı şəkildə qorunur, ölkəmizin beynəlxalq mövqeləri daha da möhkəmlənir və regionda sabitliyin təmin olunmasına mühüm töhfə verir. 26 İyun - Silahlı Qüvvələr Günü hər bir azərbaycanlı üçün yalnız bayram deyil, həm də dövlətə, Vətənə və qəhrəman Ordumuza hörmət və ehtiram günüdür. Azərbaycanın qüdrətli Ordusu bundan sonra da müstəqilliyimizin keşiyində dayanacaq, xalqımızın təhlükəsizliyini və dövlətimizin milli maraqlarını layiqincə qoruyacaq.
Bölmənin digər xəbərləri
