GÜLLƏ ATICILIĞI ÜZRƏ AKADEMİK ZİYA BÜNYADOVUN XATİRƏSİNƏ HƏSR OLUNMUŞ TURNİR KEÇİRİLİR
AZƏRTAC xəbər verir ki, “Neftçi” İdman Sağlamlıq Mərkəzinin tirində güllə atıcılığı üzrə akademik Ziya Bünyadovun xatirəsinə həsr olunmuş turnir keçirilir. Yarışda Azərbaycan idmançıları ilə yanaşı, Gürcüstan atıcıları da mübarizə aparırlar.
Dekabrın 13-də pnevmatik tapançadan atəş açma yarışlarına yekun vurulmuşdur.
Azərbaycanın güllə atıcısı, Afina Yay Olimpiya Oyunlarının bürünc medalçısı İradə Aşumova qadınların yarışında fəxri kürsünün ən yüksək pilləsinə qalxmışdır. Onun əsas rəqibi, ikiqat olimpiya çempionu gürcüstanlı Nino Salukvadze liderdən bir xal geridə qalaraq gümüş medala layiq görülmüşdür. Üçüncü yeri gənclər arasında Avropa çempionatının gümüş mükafatçısı Nigar Bağırova tutmuşdur.
Kişilərin mübarizəsində isə Şükürağa Eyvazov qızıl medala sahib çıxmışdır. “Neftçi” İSM-nin yetirməsi Ruslan Lyunyov ikinci, Levon Kadagidze (Gürcüstan) üçüncü olmuşlar.
Daha iki gün davam edəcək yarışda idmançılar kiçikçaplı tapança və tüfənglə atəşaçma yarışlarında qüvvələrini sınayacaqlar.
Bölmənin digər xəbərləri
