Gürcüstan Fransanın “Avropa Narkotiklərlə Mübarizə Koalisiyası” təşəbbüsünə qoşulub
Tbilisi, 2 oktyabr, AZƏRTAC
Gürcüstan Fransanın “Avropa Narkotiklərlə Mübarizə Koalisiyası”nın yaradılması təşəbbüsünə qoşulub. Bəyannaməni Gürcüstanın Baş naziri İrakli Kobaxidze imzalayıb.
AZƏRTAC xəbər verir ki, bu barədə Gürcüstan hökumət administrasiyası məlumat yayıb. Bildirilir ki, İrakli Kobaxidze Kopenhagendə “Avropa Siyasi Birliyi”nin 7-ci Sammiti çərçivəsində Fransa Prezidenti Emmanuel Makron və İtaliya Respublikası Nazirlər Şurasının sədri Ciorcia Meloninin həmsədrliyi ilə keçirilən tədbirdə iştirak edib. Baş nazir Gürcüstan hökumətinin narkotiklərə qarşı sərt siyasətini xüsusi qeyd edib. İ.Kobaxidze deyib ki, son aylarda Gürcüstanın hüquq-mühafizə orqanları xüsusilə böyük miqdarda narkotik vasitə ələ keçirib və bir neçə onlarla iri narkotik alverçisini həbs edib.
Gürcüstanın Baş naziri narkomaniyaya qarşı səmərəli mübarizədə dünya liderlərinin birgə səylərinin və beynəlxalq əməkdaşlığın zəruriliyini vurğulayıb və qeyd edib ki, Fransanın “Avropa Narkotiklərlə Mübarizə Koalisiyası”nın yaradılması təşəbbüsü bu istiqamətdə irəliyə doğru atılan mühüm addımdır.
AZƏRTAC-ın xüsusi müxbiri
Tbilisi
Bölmənin digər xəbərləri
