Gürcüstan hökuməti Almaniya səfirinin xahişini rədd edib
Tbilisi, 25 sentyabr, AZƏRTAC
Almaniya Federativ Respublikasının Tbilisidəki səfiri Peter Fişer Gürcüstan Hökuməti Administrasiyasının rəhbəri Levan Jorjoliani ilə görüşüb.
AZƏRTAC xəbər verir ki, bu barədə Gürcüstan Hökuməti Administrasiyası məlumat yayıb.
Görüşdə iki ölkə arasında münasibətlərin son dinamikası müzakirə olunub. Qeyd olunub ki, Gürcüstan hökuməti ikitərəfli münasibətlərin hazırkı səviyyəsindən razı deyil və vəziyyətin dəyişəcəyinə ümid edir.
Müzakirə zamanı diplomatın Gürcüstan Xarici İşlər Nazirliyinə çağırılması məsələsinə toxunulub. Bildirilib ki, bu tədbir müvafiq ilkin şərtlərə əsaslanıb.
L.Jorjoliani Gürcüstan hökumətinin tərəfdaş ölkələrlə əlaqələrə böyük əhəmiyyət verdiyini və diplomatik nümayəndələrin fəaliyyətinin qarşılıqlı hörmətə əsaslanan əməkdaşlıq prinsiplərinə uyğun olaraq bundan sonra da davam edəcəyinə ümidvar olduğunu bildirib.
Görüş zamanı Gürcüstanın "Qrantlar haqqında" Qanunu da müzakirə olunub. Almaniya səfiri xahiş edib ki, Gürcüstan hökuməti alman təşkilatlarının gürcü QHT-lərinə verdiyi müqavilələrin verilməsi istiqamətində istisnalara icazə versin.
Levan Jorjoliani səfirə qrantların verilməsinə razılığın alınması prosedurunu izah edib və bildirib ki, qanun hamıya eyni dərəcədə şamil edilir. Gürcüstan hökuməti ayrı-seçkilikli yanaşmalara yol verə bilməz.
Xətayi Əzizov
AZƏRTAC-ın xüsusi müxbiri
Tbilisi
Bölmənin digər xəbərləri
