Gürcüstanın xarici işlər naziri Salome Zurabişvili başçılıq etdiyi qurumda planlaşdırılan struktur dəyişikliklərinin konsepsiyasını hökumətə təqdim etmişdir. Konsepsiya hökumət üzvlərinin marağına səbəb olmuş və bəyənilmişdir. Layihədə nazirlikdə əməkdaşların 20 faizinin ixtisar olunacağı, 61 idarədən 31-nin, 22 departamentdən 15-nin saxlanacağı göstərilir. Nazirlikdə strateji planlaşdırma və varislik mərkəzi yaradılacaqdır.

AZƏRTAC-ın xüsusi müxbiri xəbər verir ki, S.Zurabişvili Gürcüstanın xarici ölkələrdəki səfirliklərinə də yeni qaydada yanaşır. Onun sözlərinə görə, indiyədək səfirliklər Gürcüstan vətəndaşlarının deyil, ancaq parlament üzvlərinin mənafeyini müdafiə etmişlər.

Xarici işlər naziri üç formatlı səfirliklər yaratmağı planlaşdırır. Birinci formatlı səfirliklər ABŞ-da, Avropa Birliyində və Rusiyada fəaliyyət göstərəcəkdir. Onlarda 10-14 nəfər diplomat işləyəcəkdir. Əksər ölkələrdə isə orta formatlı klassik tipli 4-6 diplomatdan ibarət səfirlik yaradılacaqdır. 2-3 nəfər diplomatdan ibarət üçüncü formatlı kiçik səfirliklər Gürcüstanın iqtisadi əlaqələr yaratmaq istədiyi ölkələrdə fəaliyyət göstərəcəkdir. Bu cür səfirliklərin Orta Asiyada və Yaxın Şərqdə yaradılması nəzərdə tutulur.